જામનગર શહેરમાં ગુરૂદ્વારા ચોકડી પાસેથી પસાર થતા શખ્સને આંતરીને તલાશી લેતા તેના કબ્જામાંથી રૂા.11 હજારની કિંમતની દારૂની 22 બોટલો મળી આવતા અટકાયત કરી વધુ પૂછપરછ હાથ ધરી હતી. જામનગર શહેરના 54 દિગ્વિજય પ્લોટ વિસ્તારમાંથી દારૂની બોટલ સાથે એક શખ્સને ઝડપી લીધો હતો. જામનગરના રામેશ્વરનગરમાંથી પોલીસે રેઇડ દરમ્યાન દારૂની બોટલ સાથે શખ્સને ઝડપી લઇ આગળની તપાસ હાથ ધરી હતી.
દારૂ અંગેના દરોડાની વિગત મુજબ પ્રથમ દરોડો જામનગર શહેરમાં ગુરૂદ્વારા ચોકડી માર્ગ પરથી પસાર થતાં ક્રિપાલસિંહ સુખદેવસિંહ ઝાલા નામના શખ્સને પોલીસે આંતરીને તલાશી લેતા તેના કબ્જામાંથી રૂા.11 હજારની કિંમતની 22 બોટલ દારૂ મળી આવતા ક્રિપાલસિંહની અટકાયત કરી પૂછપરછ હાથ ધરી હતી. બીજો દરોડો જામનગર શહેરના દિગ્વિજય પ્લોટ 54 વિસ્તારમાં આવેલા વીશ્રામવાડી ચોકમાંથી પસાર થતા કપીલ ઉર્ફે ચોર અશોક ભદ્રા નામના શખ્સને આંતરીને તલાશી લેતા તેના કબ્જામાંથી રૂા.500ની કિંમતની દારૂની એક બોટલ મળી આવતા કપીલની પૂછપરછ હાથ ધરતા આ દારૂની બોટલ રાહુલ ઉર્ફે દાબેલી કાંતિ મંગે નામના શખ્સ પાસેથી ખરીદ્યાની કેફિયત આપતા પોલીસે આગળની કાર્યવાહી હાથ ધરી હતી.
જામનગર શહેરના રામેશ્વર નગર વિનાયક પાર્કમાં આવેલા રોનિત રેસીડેન્સી વાળી શેરીમાંથી પસાર થતા અક્રમ ઉર્ફે અકુડો ગફાર ઓડિયા નામના શખ્સને આંતરીને તલાશી લેતા તેના કબ્જામાંથી રૂા.500 ની કિંમતની દારૂની એક બોટલ મળી આવતા પોલીસે અક્રમની અટકાયત કરી વધુ પૂછપરછ હાથ ધરી હતી.
