ગુજરાતનું અર્થતંત્ર પોતાની અગાઉની ઝડપ કરતાં પણ ખુબ વધુ ઝડપે દોડતું થઇ ગયું છે. જીએસટી કલેકશનના આંકડાઓ આમ કહે છે. જાન્યુઆરી 2020માં એટલે કે,કોરોના-લોકડાઉન પહેલાં ગુજરાતનું અર્થતંત્ર જે ઝડપે દોડતું હતું. તેના કરતાં પણ વધુ ઝડપ અર્થતંત્રએ જાન્યુઆરી 2021માં મેળવી લીધી છે.
જાન્યુઆરી 2020માં ગુજરાતનું જીએસટી કલેકશન રૂા.7,330 કરોડ હતું. તે 8.6% વધીને જાન્યુઆરી 2021માં રૂા.7,769 કરોડના આંકડે પહોંચ્યું છે.કલેકશનનો આ આંકડો અત્યાર સુધીનો સૌથી મોટો છે. રાજયના વાણિજય વેરા કમિશ્નર જે.પી.ગુપ્તાએ જણાવ્યું છે કે, કોરોના અને લોકડાઉનની અસરોમાંથી આપણે બહાર આવી ચુકયો છીએ.
આ અગાઉ 2020ના ડિસેમ્બર માસમાં પણ જીએસટી કલેકશનમાં 6.6%નો માસિક વધારો જોવા મળ્યો હતો. જાન્યુઆરી 2020માં રાજયમાં 76,00,000 ઇ-વેબીલ જનરેટ થયા હતાં. તેની સામે 2021ના જાન્યુઆરીમાં 82,00,000 ઇ-વેબીલ જનરેટ થયા છે. આ વધારો પણ લગભગ 7% જેટલો દેખાડી શકાય. આ ઉપરાંત સરકારની એકંદર આવકમાં લગભગ 14% જેટલો વધારો થયો છે. ગુજરાતમાં ઉત્પાદન અને વેપારની પ્રવૃતિએ જોરદાર ઝડપ હાસંલ કરી લીધી છે.
