કૂવામાં પડેલા સિંહ નું રેસ્કયુ ઓપરેશનઃ ભારે દોડધામ બાદ વનવિભાગે બચાવ્યું જીવન

તાલાલા તાલુકાના ધાવગીર ગામે એક સિંહ અકસ્માતે ઊંડા કૂવામાં પડી ગયો હતો. કૂવામાં પાણી ભરેલું હોવાથી સિંહ ફસાઈ ગયો હતો અને બહાર આવી શકતો ન હતો. આ દ્રશ્ય જોઈ ગ્રામજનો ગભરાઈ ગયા અને તરત જ વનવિભાગને જાણ કરી.

જાણ મળતા જ તાલાલા રેન્જની વનવિભાગની રેસ્ક્યુ ટીમ તરત સ્થળ પર પહોંચી હતી. કૂવો ઊંડો અને પાણીથી ભરેલો હોવાથી સિંહને બહાર લાવવું સહેલું નહોતું, પરંતુ વનકર્મચારીઓએ ભારે મહેનત કરીને બચાવ કામગીરી શરૂ કરી.

આ કામગીરી લગભગ દોઢ કલાક સુધી ચાલી હતી. વનવિભાગની મહેનત પરિણામે સિંહને સલામત રીતે કૂવામાંથી બહાર કાઢવામાં આવ્યો. બાદમાં તેને પાંજરામાં મૂકી પ્રાથમિક સારવાર માટે પશુ સંભાળ કેન્દ્રમાં ખસેડવામાં આવ્યો છે.