જામનગરના નાઘેડી નજીક કારે ઠોકરે ચડાવતા રાહદારીનું મોત

જામનગર નજીક આવેલા નાઘેડી ગામના પાટીયા પાસેથી રસ્તો ક્રોસ કરતા રાહદારીને પૂરઝડપે આવી રહેલી કારે ઠોકરે ચડાવતા ગંભીર ઈજા પહોંચતા ઘટનાસ્થળે જ મોત નિપજ્યાના બનાવમાં પોલીસે તપાસ હાથ ધરી હતી.

અકસ્માતના બનાવની વિગત મુજબ, જામનગર તાલુકાના નાઘેડી ગામના પાટીયા પાસે આજે સવારના સમયે પ્રૌઢ રસ્તો ક્રોસ કરતા હતાં તે દરમિયાન પૂરપાટ આવી રહેલી કારના ચાલકે રાહદારીને ઠોકર મારી હડફેટે લેતા આ અકસ્માતમાં પ્રૌઢને શરીરે તથા માથામાં ગંભીર ઈજા પહોંચી હતી. જેના કારણે પ્રૌઢનું ઘટનાસ્થળે જ મોત નિપજ્યું હતું. અકસ્માતના બનાવની જાણ થતા પોલીસ કાફલો ઘટનાસ્થળે દોડી ગયો હતો અને સ્થળ પરથી મૃતદેહનો કબ્જો સંભાળી મૃતકની ઓળખ મેળવવા અને જામનગર પાસીંગની કારના ચાલક વિરૂધ્ધ ગુનો નોંધવા તજવીજ હાથ ધરી હતી.