જામનગર તાલુકાના જાંબુડા ગામના પાટીયા નજીક આજેવહેલીસવારે ઈકો કાર અને બાઈક વચ્ચે થયેલા અકસ્માતમાં બાઈકસવાર વ્યક્તિનું ઘટનાસ્થળે જ ગંભીર ઈજા પહોંચતા મોત નિપજ્યું હતું. અકસ્માતની જાણ થતા પોલીસકાફલો ઘટનાસ્થળે દોડી ગયો હતો.
અકસ્માતના બનાવની વિગત મુજબ, જામનગર તાલુકાના જાંબુડા ગામના પાટીયા પાસે આજે વહેલીસવારે પસાર થતી જીજે-10-ડીજે-2336 નંબરની ઈકો કાર અને બાઈક અથડાતા અકસ્માત થયો હતો. આ અકસ્માતમાં બાઈક પર સવાર બે વ્યક્તિઓ પૈકીના એક યુવાનને શરીરે અને માથામં ગંભીર ઈજા પહોંચતા ઘટનાસ્થળે જ મોત નિપજ્યું હતું. જ્યારે અન્ય વ્યક્તિને ઈજા પહોંચી હતી. બનાવની જાણ થતા 108 એમ્બ્યુલન્સ દ્વારા ઈજાગ્રસ્તને સારવાર માટે હોસ્પિટલમાં ખસેડવામાં આવ્યો હતો. અકસ્માત અંગેની જાણના આધારે પોલીસ કાફલો તાત્કાલિક ઘટનાસ્થળે પહોંચી ગયો હતો અને સ્થળ પરથી યુવાનના મૃતદેહનો કબ્જો સંભાળી પીએમ માટે મોકલવા તથા ઓળખ મેળવવા કાર્યવાહી હાથ ધરી હતી.
