ગત દેવઊઠી એકાદશી બાદ શરૂ થયેલી લગ્નસરાની નવી સિઝન સાથે જ શહેરમાં લગ્નોની ભરમાર જોવા મળી રહી છે. લગ્નસરાના આરંભે ઓછા મુહૂર્તની સામે સંખ્યાબંધ લગ્ન આયોજનો દેખાઈ રહ્યા છે. એવામાં હવે 16 જાન્યુઆરીના શુક્રવારે કમુરતાં શરૂ થવાની સાથે જ લગ્નસરા આડે એક મહિનાનો વિરામ રહેશે. સૂર્યદેવના રાશિ પરિવર્તનની સાથે જ ધનારક એટલે કે કમુરતાંનો આરંભ થશે. 16 ડિસેમ્બરના શુક્રવારે સવારે 9.59 વાગ્યાથી 14 જાન્યુઆરીએ મકરસંક્રાંતિ નિમિત્તે રાત્રિએ 8.46 વાગ્યા સુધી ધનારકને કારણે લગ્ન સહિતના શુભ કાર્યો વર્જિત માનવામાં આવે છે.
હિન્દુ સનાતન ધર્મમાં દરેક કાર્ય માટે યોગ્ય મુહૂર્ત નિશ્ચિત કરાયા છે. અમુક શુભ કાર્યો અમુક સમયમાં નિષેધ માનવામાં આવે છે. આવો જ એક સમય ધનારક અને મીનારક ગણવામાં આવે છે. સૂર્યદેવ ધન રાશિમાં અને મીન રાશિમાં આવે ત્યારે ધન સંક્રાંતિ, મીન સંક્રાતિ ગણવામાં આવે છે. આ સમયને કમુરતાં કહેવામાં આવે છે. આ સમય લગભગ એક મહિનાનો હોય છે. તેમાં લગ્ન, સગાઈ, મૂંડન, પ્રાણપ્રતિષ્ઠા. નવવધૂ પ્રવેશ, ગૃહઆરંભ. ગૃહપ્રવેશ, વ્રત આરંભ કે પારણા સહિતના શુભ કાર્યો નિષેધ માનવામાં આવે છે.
