ઉત્તર પ્રદેશના ગોરખપુર જિલ્લામાં સાસુ-વહુની તકરારનો એક પરેશાન કરનારો મામલો સામે આવ્યો છે. ખાવાનું બનાવવા જેવી મામૂલી વાત પર સાસુ-વહુ વચ્ચે ઝઘડો થઈ ગયો અને તે ઝઘડો પોલીસ સ્ટેશન સુધી પણ પહોંચી ગયો.
ટીવી સિરિયલ જોઈ રહેલાં સાસુએ જમવાનું બનાવવાનો ઈનકાર કરી દીધો, તો વાંસી ખાવાનું ખાઈ ખાઈને કંટાળેલી પુત્રવધૂએ 112 પર કોલ કરીને પોલીસ બોલાવી લીધી. એ બાદ પોલીસે બંનેને સમજાવીને મામલો થાળે પાડ્યો, સાથે જ પોલીસ સાસુ-પુત્રવધૂને ચેતવણી પણ આપી કે બીજી વખત આવું થયું તો બંને વિરુદ્ધ કડક કાર્યવાહી કરવામાં આવશે.
આ ઘટના ગોરખપુરના ગગહા પોલીસ સ્ટેશન વિસ્તારની છે. જ્યાં મંઝગાંવામાં એક પરિવારમાં સાસુ-પુત્રવધૂ ઘરમાં એકલા જ રહેતા હતા. બંનેના પતિ બહાર રહીને નોકરી કરે છે. બંને સાસુ-વહુ એકલા રહેવાને કારણે નાની-નાની વાતોએ વિવાદ થતો રહેતો હતો. ગગહા પોલીસે આપેલી જાણકારી મુજબ મંઝગાંવાથી એક મહિલાની સૂચના આવી હતી તેની સાસુએ તેને વાસી ખાવાનું આપ્યું, જેનાથી તેની તબિયત ખરાબ થઈ ગઈ છે. અવારનવાર તેની સાસુ તેને વાસી ખાવાનું આપે છે.
સુચના બાદ પોલીસની પીઆરવી 112 ઘટના સ્થળે પહોંચી. જ્યાં જઈને પોલીસને ખ્યાલ આવ્યો કે સાસુ-વહુ બંનેના પતિ બહાર રહીને નોકરી કરે છે. ઘરમાં માત્ર સાસુ અને પુત્રવધૂ જ રહે છે, ત્યારે તેઓ વચ્ચે વારંવાર વિવાદ થતો રહે છે. જ્યારે આ અંગે મહિલા પાસેથી જાણકારી લેવામાં આવી તો તેને જણાવ્યું કે તેની સાસુ તેને વાસી ખાવાનું આપે છે અને તેના કારણે તે વારંવાર બીમાર પડે છે. જ્યારે તેની સાસુ આખો દિવસ ટીવી જોયા કરે છે.
પોલીસનું કહેવું છે કે મહિલાની સાસુનો આરોપ છે કે પુત્રવધૂ ખોટું બોલી રહી છે. તે પુત્રવધૂને હંમેશા ગરમ ગરમ જમવાનું જ આપે છે. સાસુએ કહ્યું કે તેની પુત્રવધૂ ક્યારેય જમવાનું નથી બનાવતી અને આખો દિવસ તે પોતાના મોબાઈલમાં બિઝી રહે છે. પોલીસની હાજરીમાં જ સાસુ-પુત્રવધૂ ઝઘડવા લાગ્યા, જે જોઈને પોલીસે બંનેને કોઈ રીતે સમજાવીને શાંત કર્યા.
પોલીસે બંનેને આવું ન કરવાની ચેતવણી પણ આપી. સાથે જ કહ્યું કે જો સાસુ કે પુત્રવધૂ ફરી આવું કરશે તો તેમના વિરૂદ્ધ કડક કાર્યવાહી પણ કરવામાં આવી શકે છે. પોલીસની મધ્યસ્થી બાદથી સાસુ-વહૂએ હાલ તો હથિયાર હેઠાં મૂક્યા છે, પરંતુ હાલ આ મામલો સમગ્ર વિસ્તારમાં ટોક ઓફ ધ ટાઉન બન્યો છે.
