દ્વારકા તાલુકાના મેવાસા ગામના વાડી વિસ્તારમાં રહેતા પાચુભા નાનાભા માણેક નામના 42 વર્ષના હિન્દુ વાઘેર યુવાનને ગત તારીખ 2 ના રોજ રાત્રિના સમયે રસ્તામાં રોકી, આ જ ગામના હાડાભા ગગાભા માણેક, કારૂભા હાડાભા માણેક, રવિભા હાડાભા માણેક અને કરણભા ગગાભા માણેક નામના ચાર શખ્સોએ બિભત્સ ગાળો કાઢી, ઢીકા-પાટુનો માર માર્યાની તથા ભાલા અને છરી તથા લાકડાના ધોકા વડે બેફામ માર મારીને ઇજાઓ કર્યાની ઉપરાંત જાનથી મારી નાખવાની ધમકી આપ્યાની ફરિયાદ દ્વારકા પોલીસ મથકમાં નોંધાવવામાં આવી છે.
ફરિયાદી તથા આરોપીઓની જમીન એક જ શેઢે આવેલી હોય, આ સ્થળે ફરિયાદી પાચુભાના ભત્રીજાએ લીમડાના ઝાડમાંથી ડાળીઓ કાપેલી હોય, આ ડાળી કાપવા બાબતનો ખાર રાખી આરોપીઓ દ્વારા હુમલો કરવામાં આવ્યો હોવાનું પોલીસ ફરિયાદમાં જાહેર થયું છે.
આ બનાવ અંગે પોલીસ આઈપીસી કલમ 323, 324, 504, 506 (2), 114 તથા જી.પી. એક્ટની કલમ મુજબ ગુનો નોંધી, આગળની કાર્યવાહી હાથ કરી છે.
