જામનગરમાંથી મેફેડ્રોન પાવડર સાથે શખ્સ ઝડપાયો

જામનગર શહેરના શાકમાર્કેટ મીનારાફળી વિસ્તારમાં રહેતાં શખ્સના મકાનમાં મેફેડ્રોન ડ્રગ્સનો જથ્થો હોવાની બાતમીના આધારે એસઓજીની ટીમે રેઈડ દરમિયાન 27 ગ્રામ મેફેડ્રોન ડ્રગ્સ સાથે શખ્સને ઝડપી લઇ કાર્યવાહી હાથ ધરી હતી.

મળતી વિગત મુજબ, જામનગર શહેરમાં શાકમાર્કેટ મીનારાફળી વિસ્તારમાં રહેતા સમીર શેખ મેફેડ્રોન ડ્રગ્સનું વેચાણ કરતો હોવાની એસઓજીના દિનેશ સાગઠિયા, સંજય પરમાર તથા હર્ષદ ડોરિયાને મળેલી સંયુકત બાતમીના આધારે જિલ્લા પોલીસવડા દિપન ભદ્રનની સૂચનાથી પીઆઈ એસ.એસ. નિનામાના માર્ગદર્શન હેઠળ પીએસઆઈ આર.વી. વીંછી અને વી.કે.ગઢવી તથા સ્ટાફે રેઈડ દરમિયાન સમીર ઉર્ફે જીમી ઉર્ફે સેમ મેહમુદ અલી શેખ નામના શખ્સના મકાનમાંથી તલાસી લેતા રૂા.2.70 લાખની કિંમતનો 27 ગ્રામ મેફેડ્રોન ડ્રગ્સનો જથ્થો મળી આવતા પોલીસે રૂા.10 હજારની કિંમતનો એક મોબાઈલ, રૂા. 2,130 ની રોકડ, પ્લાસ્ટિકની કોથળીઓ સહિત રૂા.2,82,130 નો મુદ્દામાલ કબ્જે કરી ધરપકડ કરી હતી.

એસઓજીની ટીમે સમીરની પૂછપરછ હાથ ધરતા મેફેડ્રોન ડ્રગ્સના વેચાણમાં નદીમ મેહમુદ અલી શેખની સંડોવણી ખુલ્લી હતી. એસઓજીની ટીમે આરોપી અને મુદ્દામાલ સિટી એ ડિવિઝન પોલીસને સોંપી આપ્યા હતાં જેના આધારે પીએસઆઈ એમ.વી. મોઢવાડિયા તથા સ્ટાફે સમીરની ધરપકડ કરી નદીમની શોધખોળ માટે ચક્રો ગતિમાન કર્યા હતાં.