જામનગર શહેરના જુના રેલવે સ્ટેશન પાસે આવેલા વેલનગરમાં રહેતાં શખ્સની દુકાનમાં દેશી દારૂના પીઠા ઉપર એલસીબીની ટીમે રેઈડ દરમિયાન રૂા.10,520 ના મુદ્દામાલ સાથે પાંચ પીધેલા સહિત સાત શખ્સોને ઝડપી લઇ આગળની કાર્યવાહી હાથ ધરી હતી.
દરોડાની વિગત મુજબ, જામનગર શહેરમાં જૂના રેલવે સ્ટેશન પાસે વેલનગરમાં રહેતાં શખ્સના કબ્જાની દુકાનમાં દેશી દારૂનું પીઠુ ચલાવતું હોવાની હરદીપ ધાંધલ, શિવભદ્રસિંહ જાડેજા, ફિરોજ ખફીને મળેલી બાતમીના આધારે જિલ્લા પોલસીવડા પ્રેમસુખ ડેલુની સૂચનાથી પીઆઈ જે.વી. ચૌધરી, પીએસઆઈ એસ.પી.ગોહિલ તથા સ્ટાફના સંજયસિંહ વાળા, હરપાલસિંહ સોઢા, ભરતભાઈ પટેલ, શરદભાઈ પરમાર, દિલીપભાઈ તલાવડિયા, ભગરથસિંહ સરવૈયા, હરદીપભાઈ ધાંધલ, અશોકભાઈ સોલંકી, વનરાજભાઇ મકવાણા, ધાનાભાઈ મોરી, યશપાલસિંહ જાડેજા, હિતેન્દ્રસિંહ જાડેજા, અજયસિંહ ઝાલા, શિવભદ્રસિંહ જાડેજા, નિર્મળસિંહ જાડેજા, રાકેશભાઈ ચૌહાણ, કિશોરભાઈ પરમાર, સુરેશભાઇ માલકિયા, દયારામ ત્રિવેદી, બિજલભાઈ બાલાસરા, ધર્મેન્દ્રસિંહ જાડેજા સહિતના સ્ટાફ દ્વારા જીજ્ઞેશ ઉર્ફે જીગો નરશી રાઠોડ નામના શખ્સના કબ્જાની દુકાનમાં રેઈડ પાડી હતી.
એલસીબીની ટીમે રેઈડ દરમિયાન મંગલ કરમશી પાટડિયા, યુવરાજસિંહ જીતેન્દ્રસિંહ ચાવડા, સુરેન્દ્રસિંહ રૂપસિંહ ભાટ્ટી, જયેશ લક્ષ્મણભાઈ પીલાઇ, બીસુમંગલ પંચવીર મંગલ સહિતના પાંચ શખ્સો નશો કરેલી હાલતમાં મળી આવતા અટકાયત કરી હતી. તેમજ જયદીપ મનીજી રાઠોડ અને જીજ્ઞેશ નરીશ રાઠોડ નામના બે શખ્સોને ઝડપી લઇ કુલ સાત શખ્સોની ધરપકડ કરી દારૂના પીઠામાંથી રૂા.320 ની કિંમતનો 16 લીટર દેશી દારૂ તથા 9000 ની રોકડ અને કેરમ બોર્ડ, કુકરી, પ્લાસ્ટિકના કેરેટ બોકસ, ડીસ્પ્લોઝ ગ્લાસ અને બાઈટીંગ સહિત રૂા.10,520 નો મુદ્દામાલ કબ્જે કર્યો હતો તેમજ જીજ્ઞેશ રાઠોડના મકાન પર રેઈડ દરમિયાન રૂા.200 ની કિંમતનો 10 લીટર દેશી દારૂ મળી આવતા ગુનો નોંધી આગળની કાર્યવાહી હાથ ધરી હતી.
