જોડિયા તાલુકાના સામપર ગામમાં રહેતાં વૃદ્ધને પથરીનું ઓપરેશન કરાવ્યું હોવાથી દુ:ખાવો સહન ન થતા જિંદગીથી કંટાળીને તેના ઘરે ઝેરી દવા પી નદીમાં પડી આપઘાત કર્યાના બનાવમાં પોલીસે તપાસ આરંભી હતી.
બનાવની વિગત મુજબ, જોડિયા તાલુકાના સામપર ગામમાં રહેતા જયંતીભારથી અમરભારથી ગોસાઈ (ઉ.વ.70) નામના વૃધ્ધને ઘણાં સમયથી પથરી અને પ્રોસ્ટેટની તકલીફ હોવાથી બે સપ્તાહ પૂર્વે ઓપરેશન કરાવ્યું હતું. આ ઓપરેશન બાદ પણ સતત દુ:ખાવો રહેતો હતો અને દુ:ખાવો સહન ન થવાથી સુનમુન અને ઉદાસ રહેતા હતાં. દરમિયાન બુધવારે સાંજના સમયે તેના ઘરે ઝેરી દવા પી અને ગામની સીમમાં આવેલી નદીમાં ઝંપલાવી આપઘાતનો પ્રયાસ કર્યો હતો. ત્યારબાદ વૃધ્ધને નદીમાંથી બહાર કાઢી જોડિયાની સરકારી હોસ્પિટલમાં ખસેડવામાં આવ્યાં હતાં. જ્યાં તેમનું ફરજ પરના તબીબોએ મોત નિપજ્યાનું જાહેર કર્યુ હતું. આ બનાવ અંગેની મૃતકના પુત્ર ઉપેન્દ્રભારથી ઉર્ફે મુન્ના મહારાજ દ્વારા જાણ કરાતા એએસઆઈ આર.એમ. જાડેજા તથા સ્ટાફે હોસ્પિટલ પહોંચી જઇ મૃતદેહનો કબ્જો સંભાળી પીએમ માટે મોકલી આગળની કાર્યવાહી હાથ ધરી હતી.
