જામનગર સહિત સમગ્ર ગુજરાતમાં કોરોના વાયરસના કેસોમાં સતત વધારાના પગલે રાજ્ય સરકાર દ્વારા આંશિક લોકડાઉન સાથે રાત્રી કફર્યૂ લાડયો હતો. ગઇકાલે આ નિયંત્રણોની મુદ્ત પુરી થતી હોય, રાજ્ય સરકાર દ્વારા કોરોના વાયરસના કેસોમાં ઘટાડાના પગલે આજથી મીની લોકડાઉન આંશિક છૂટછાટ આપીને સવારે 9 થી બપોરે 3 વાગ્યા સુધી વેપાર-ધંધાની મંજૂરી આપવાનો નિર્ણય લેતાં જામનગરમાં આજે સવારથી વેપાર-ધંધાઓ ફરીથી ધમધમવા લાગ્યા હતાં.
રાજ્યમાં કોરોના સંક્રમણ વધતાં મીની લોકડાઉન લાગુ કરાયું હતું. હવે સરકાર દ્વારા તેમાં આંશિક રાહત આપવામાં આવી છે. આજથી સવારે 9 થી બપોરે 3 વાગ્યા સુધી લારી-ગલ્લાધારકો તેમજ વેપારીઓને છૂટછાટ આપવાનો નિર્ણય લેવામાં આવ્યો છે. રાજ્ય સરકારના આ નિર્ણયથી વેપારીઓને રાહત મળી હતી. જામનગરમાં સવારે 9 વાગ્યાથી તમામ દુકાનો ખુલ્લી હતી. શહેરની સુપર માર્કેટ, દરબારગઢ, બેડી ગેઇટ, ટાઉનહોલ, રણજીત રોડ સહિતના વિસ્તારો ફરીથી ધમધમવા લાગ્યા હતાં. તો બીજીતરફ લારી-ગલ્લાને પણ મંજૂરી મળતાં ખાણી-પીણીની રેંકડીઓ પણ ખુલતાં સવારથી જ લોકોની ભીડ જામી હતી.
