દેશમાં કોરોના વાયરસના વધી રહેલા સંક્રમણ વચ્ચે આજથી 18 વર્ષથી ઉપરના લોકોનું વેક્સીનેશન શરુ કરવામાં આવ્યું છે.આજે રોજ રશિયાની કોરોના વેક્સિન સ્પુતનીક-vનો પહેલો જથ્થો ભારત આવી પહોચશે. સ્પુતનીક-v મળતાની સાથે જ ભારતમાં રસીકરણની પ્રક્રિયા વધુ ઝડપી બનશે.
ન્યૂઝ એજન્સી રોઈટર્સે રશિયન ડાયરેક્ટ ઈન્વેસ્ટમેન્ટ ફંડ (આરડીઆઈએફ)ના એક અધિકારીએ જણાવ્યું છે કે ભારતને 1 મેના રોજ રશિયન કોરોના વેક્સિન ‘સ્પૂતનિક-V’નો પ્રથમ જથ્થો મળી જશે. રશિયાની આ વેક્સિન સપ્લાઈ ભારતને કોરોના વાયરસ મહામારીની બીજી લહેરમાંથી બહાર નીકળવામાં મદદ કરશે. રશિયન વેક્સિન ‘સ્પૂતનિક-Vની ત્રીજી તબક્કાની ટ્રાયલમાં તે 91.6 ટકા અસરકારક સાબિત થઈ હતી અને કોઈ આડઅસર પણ જણાઈ ન હતી.
ભારતમાં રશિયન કોરોના વેક્સિન ‘સ્પૂતનિક-V’ ને ઈમરજન્સી ઉપયોગને મંજૂરી આપવામાં આવી હતી. ભારતની સેન્ટ્રલ મેડિસીન ઓથોરિટીની એક નિષ્ણાત સમિતિએ દેશમાં કેટલીક શરતો સાથે રશિયન કોરોના વેક્સિન ‘સ્પૂતનિક- V’ ના ઈમરજન્સી ઉપયોગને મંજૂરી આપવાની ભલામણ પણ કરવામાં આવી હતી, જેને ડ્રગ કંટ્રોલર ઓફ ઇન્ડિયા દ્વારા મંજૂરી આપવામાં આવી છે. ભારત સિવાય 60 દેશોએ સ્પૂતનિક- Vને મંજૂરી આપી છે.
હાલમાં, કોવેક્સિન અને કોવિશિલ્ડ બંને રસી સરકારી હોસ્પિટલોમાં વિના મૂલ્યે ઉપલબ્ધ છે. ત્યારે સ્પુતનિક-v ની કિંમત શું હશે તે અંગે કોઈ સ્પષ્ટતા નથી. સ્પુતનિકના ઉપયોગને મંજૂરી આપનારા દેશોમાં, તેની રસીની કિંમત આશરે 750રૂપિયા છે. જો કે, સ્પૂતનિક- V વેક્સિનના સત્તાવાર ભાવની જાહેરાત કરવામાં આવી નથી.
