જામનગરના નવાગામ ઘેડ વિસ્તારમાં રહેણાંક મકાનમાંથી પોલીસે રેઈડ દરમિયાન રૂા.12000 ની દારૂની 24 બોટલો સાથે એક શખ્સને ઝડપી લઇ પુછપરછ હાથ ધરતા દારૂ સપ્યાલરનું નામ ખુલ્યું હતું. ધ્રોલ ગામમાંથી બે શખ્સોને દારૂની એક બોટલ સાથે પોલીસે ઝડપી લઇ પૂછપરછ હાથ ધરી હતી તેમજ જામનગરના પટેલ કોલોની શેરી નં.6 મા રહેતા શખ્સને દારૂની બોટલ સાથે પોલીસે ઝડપી લીધો હતો.
દારૂના દરોડાની વિગત મુજબ, પ્રથમ દરોડો જામનગર શહેરના નવાગામ ઘેડમાં આવેલા હનુમાન ચોક વિસ્તારમાં રહેતા શખ્સના મકાનમાં ઈંગ્લીશ દારૂ હોવાની મળેલી બાતમીના આધારે બી ડિવિઝન પોલીસે રેઈડ દરમિયાન રોહિત વિશાલ સિંગાળા નામના શખ્સના મકાનમાંથી રૂા.12 હજારની કિંમતની દારૂની 24 બોટલો મળી આવતા પોલીસે રોહિતની ધરપકડ કરી પૂછપરછ હાથ ધરતા આ દારૂનો જથ્થો સાગર ઉર્ફે મહાકાલ નામના શખ્સે સપ્લાય કર્યો હોવાનું જણાવતા પોલીસે સાગરની શોધખોળ માટે તપાસનો ધમધમાટ શરૂ કર્યો હતો.
બીજો દરોડો, ધ્રોલ ગામમાં નગરપાલિકા પાસેથી પસાર થતા સમીર છોટુ મેઘાણી અને નરોતમ અરજણ નામના બે શખ્સોને આંતરીને તલાસી લેતા તેના કબ્જામાંથી દારૂની એક બોટલ મળી આવતા અટકાયત કરી પૂછપરછ હાથ ધરી હતી. ત્રીજો દરોડો, જામનગર શહેરના પટેલ કોલોની શેરી નં.6 મા જાહેર રોડ પરથી પસાર થતા રવિરાજસિંહ ઉર્ફે ભુરો રાજેન્દ્રસિંહ પરમાર નામના શખ્સને આંતરીને તલાસી લેતા તેના કબ્જામાંથી રૂા.500 ની કિંમતની દારૂની બોટલ મળી આવતા અટકાયત કરી આગળની કાર્યવાહી હાથ ધરી હતી.
