રાજયના વનવિભાગે એકટેલિફોન ડિરેકટરી લોન્ચ કરી છે. આ ડિરેકટરીમાં તમામ તાલુકાઓ માટેના ફોન નંબરો જાહેર કરવામાં આવ્યા છે. આ ફોન નં. ની મદદ લઇને કોઇ પણ વ્યકિત મુશ્કેલીમાં ફસાયેલા કોઇપણ જંગલી પ્રાણીને (વાઇલ્ડ લાઇફ) ને બચાવી શકે છે અથવા આ પ્રકારના પ્રાણી વિરૂધ્ધ કોઇપણ પ્રકારનો ગુનો કોઇના પણ દ્વારા આચરવામાં આવતો હોય તો આ ગુનો બનતો અટકાવવા માટે વનવિભાગનો સંપર્ક કરી શકાય છે.
આ માટે રાજયના વનવિભાગે વોટ્સએપ નંબર 83 2000 2000 જાહેર કર્યો છે. આ વોટ્સએપ નંબરના માધ્યમથી કોઇ પણ વ્યકિત વનવિભાગની ડિરેકટરીમાંથી પોતાને લગત તાલુકાનો ફોન નં. મેળવી શકે છે. રાજયના મુખ્ય સીસીએફ એસ.કે.શ્રીવાસ્તવ દ્વારા આ ડિરેકટરી લોન્ચ કરવામાં આવી છે. તેઓએ કહ્યું છે કે, મોટા ભાગના લોકો પાસે વનવિભાગના નંબરો હોતા નથી. તેઓ આ વોટ્સએપ નંબરોનો ઉપયોગ કરી શકશે. આ નંબર મારફત જરૂરી વિગતો મોકલાવી શકાશે અને ફરિયાદ પણ નોંધાવી શકાશે.
