ખંભાળિયા શહેરમાં તમામ સાત વોર્ડમાં કચરો એકત્ર કરવા માટે ખાસ એજન્સીને જવાબદારી સોંપવામાં આવી છે. પરંતુ તેની કામગીરી ખૂબ જ નબળી અને અનિયમિત હોવાથી એજન્સી સામે બેદરકારીની ફરિયાદો ઉઠવા પામી છે.
ખંભાળિયા નગરપાલિકા વિસ્તાર માટે તરંગી યોજનાની જેમ વાર્ષિક આશરે રૂપિયા દોઢ કરોડના ખર્ચે ચોક્કસ એજન્સીને કામ સોંપવામાં આવ્યું છે. આ વચ્ચે ઉલ્લેખનીય છે કે નગરપાલિકામાં ફરજ બજાવતા 40 જેટલા રોજમદાર કર્મચારીઓ તેમજ ડ્રાયવરોનો પગાર ચાલુ હોવા છતાં પણ આ યોજના અમલમાં છે અને પાલિકા ઉપર પગારનું ડેમરેજ ચડે છે. આ વચ્ચે કચરાની કામગીરી યોગ્ય રીતે થતી ન હોવાનું જોવા મળી રહ્યું છે.
ખંભાળિયા શહેરના જુદા-જુદા વિસ્તારોમાં ડોર ટુ ડોર કચરો દરરોજ ઉપાડવાનો હોય છે. તેમ છતાં અહીંના પોસ વિસ્તાર એવા રામનાથ, એસ.એન.ડી.ટી.ના વોર્ડ નંબર 7 માં બે દિવસે એક વખત કચરો ઉપાડવામાં આવે છે. વિસ્તારમાં પહોંચી ન વળતા આ ડોર ટુ ડોર કચરા કલેક્શનવાળા કર્મચારીઓ પાલિકાના વિસ્તારોમાં પહોંચી ન શકતા હોવાની બાબતો વચ્ચે આ વાનમાં અન્ય એક સાથી કર્મચારીને બદલે ફક્ત ડ્રાઇવર જ આવે છે અને લોકોએ તેમાં કચરો નાખવાનો રહે છે.
તાજેતરમાં આ વિસ્તારમાં ચાર-પાંચ દિવસ કચરાનું વાહન ન આવતા આ વિસ્તારના રહીશોને પોતપોતાના ઘરમાં કચરો એકત્ર થઈ જતા ભારે મુશ્કેલીમાં મુકાઈ ગયા હતા. આ વાહનમાં સુકો કચરો અને ભીનો કચરો અલગ-અલગ નાખવાનો હોય છે. તેને બદલે તમામ ખાનામાં બધો કચરો એક સાથે જ નાખવામાં આવે છે.
કચરાનું કોઈ વાહન બગડે તો તુરંત વૈકલ્પિક વ્યવસ્થા કરવાના બદલે આ વિસ્તારમાં બીજે દિવસે કચરો એકત્ર કરવામાં આવે છે. થોડા સમય પૂર્વે કચરાના વાહનમાં કાટમાળ, પાણાં નાખી અને તેનું વજન વધુ કરાવવાની ફરિયાદો પણ ઉઠવા પામી હતી. આ ઉપરાંત અનેક વખત સફાઈ અધિકારીઓ દ્વારા તેઓને રંગે હાથે પકડીને દંડ પણ કરાયો હતો. આમ, એજન્સીની આ ગંભીર બેદરકારી શહેરભરમાં ભારે ટીકાપાત્ર બની છે. આ મુદ્દે અધિકારીઓ દ્વારા એજન્સી સામે પગલાં લેવા માટેની માંગ પણ ઉઠી છે.
