TRAI દ્વારા ટેલિકોમ ગ્રાહકો માટે નવા નિયમોનો ડ્રાફ્ટ રજૂ કરવામાં આવ્યો છે, જે હેઠળ કંપનીઓએ હવે દરેક વેલિડિટી માટે માત્ર વોઈસ અને SMS ધરાવતા સસ્તા પ્લાન આપવા ફરજિયાત બનશે. આ પગલાથી ખાસ કરીને એવા વપરાશકર્તાઓને મોટો આર્થિક ફાયદો થશે જેમને ડેટાની જરૂર નથી અને તેઓ ઓછા ખર્ચે માત્ર કોલિંગ સુવિધા ઈચ્છે છે. 28 એપ્રિલ સુધી આ અંગે હિતધારકો પાસેથી સૂચનો મંગાવવામાં આવ્યા છે.
ડી ડી ના એક અહેવાલ માં જણાવ્યા મુજબ ભારતીય દૂરસંચાર નિયામક સત્તામંડળ (TRAI) એ ટેલિકોમ કન્ઝ્યુમર પ્રોટેક્શન (તેરમો સુધારો) રેગ્યુલેશન, 2026 નો ડ્રાફ્ટ જાહેર કર્યો છે. જેનો ઉદ્દેશ્ય ગ્રાહકોને વધુ વિકલ્પો અને સસ્તી સેવાઓ ઉપલબ્ધ કરાવવાનો છે.
વોઈસ અને SMS પ્લાન પર ફોકસ
TRAI એ અગાઉ 2024 માં જાહેર કરેલા બારમા સુધારામાં સેવા પ્રદાતાઓ માટે વોઈસ અને SMS માટે ઓછામાં ઓછું એક સ્પેશિયલ ટેરિફ વાઉચર આપવાનું ફરજિયાત કર્યું હતું. જોકે, સમીક્ષામાં જાણવા મળ્યું કે કંપનીઓ મર્યાદિત વિકલ્પો જ આપી રહી છે.
ટૂંકા ગાળાના પ્લાનની માંગ
સત્તામંડળને અનેક ગ્રાહકો તરફથી રજૂઆતો મળી હતી, જેમાં ટૂંકા ગાળાના માત્ર વોઈસ અને SMS પેકની માંગ કરવામાં આવી હતી. આ બાબતને ધ્યાનમાં રાખીને નવા ડ્રાફ્ટમાં આ સમસ્યાના ઉકેલનો પ્રસ્તાવ મૂકવામાં આવ્યો છે.
દરેક વેલિડિટી સમયગાળા માટે અલગ વાઉચર
નવા પ્રસ્તાવ હેઠળ, ટેલિકોમ કંપનીઓએ વોઈસ, SMS અને ડેટાવાળા પેકની સાથે-સાથે દરેક વેલિડિટી સમયગાળા માટે માત્ર વોઈસ અને SMS ના અલગ સ્પેશિયલ ટેરિફ વાઉચર પણ આપવા પડશે. આ વાઉચર્સની કિંમત હાલના પેકની સરખામણીમાં પ્રમાણસર ઓછી હશે.
હિતધારકો પાસેથી સૂચનો માંગવામાં આવ્યા
TRAI એ આ ડ્રાફ્ટને તેની સત્તાવાર વેબસાઇટ પર જાહેર કર્યો છે અને તમામ હિતધારકો પાસેથી 28 એપ્રિલ 2026 સુધી સૂચનો અને મંતવ્યો માંગ્યા છે. આ સૂચનો ઈમેલ દ્વારા પણ મોકલી શકાય છે.
ગ્રાહકોને થશે સીધો ફાયદો
નિષ્ણાતોનું માનવું છે કે આ પગલાથી ગ્રાહકોને તેમની જરૂરિયાત મુજબ સસ્તા અને લવચીક (flexible) પ્લાન મળી શકશે. ખાસ કરીને એવા લોકોને રાહત મળશે જેમને ડેટાની જરૂર ઓછી હોય છે અને તેઓ માત્ર કોલિંગ અને મેસેજિંગ સેવાઓનો ઉપયોગ કરે છે.
