અમદાવાદનો કોરોના ડેથ રેટ આખા દેશમાં સૌથી ઊંચો

કોરોના મહામારીમાં ગત 20 એપ્રિલ સુધીમાં ગુજરાતમાં 5615 મોત થયાં હોવાનું સરકારી આંકડા બતાવે છે. આમાંથી 2667 એટલે કે 47.50% મોત તો એકલા અમદાવાદ જિલ્લામાં જ થયાં છે. હજી આ તો સરકારી આંકડા છે, બાકી અમદાવાદ શહેર લાશોના ઢગલા પર બેઠું છે અને સ્મશાનોમાં અત્યારે કેટલું વેઇટિંગ ચાલે છે એ કોઈ નથી જાણતું. રોજેરોજ છાપાંમાં પાનેપાનાં ભરીને બેસણાંની જાહેરાતો આવે છે અને કોરોના પોઝિટિવ કેસ હોવા છતાં મૃત્યુ સમયે રિપોર્ટ નેગેટિવ હોવાનું કહીને કેસને કો-મોર્બિડમાં ગણાવાય છે એ અલગ ચર્ચાનો વિષય છે, પરંતુ અહીં આપણે ફક્ત સરકારી આંકડાની વાત કરીએ તોપણ રાજ્યમાં કોરોનાથી થતાં કુલ મૃત્યુમાંથી અડધોઅડધ મોત એકલાં અમદાવાદમાં જ થાય છે.
સમગ્ર માર્ચ-2020માં ગુજરાતના સરકારી ચોપડે 74 કોરોના પોઝિટિવ કેસ નોંધાયા હતા, જેમાંથી 6નાં મોત થયાં હતાં. આમ, કેસ ફેટાલિટી રેશિયોની દૃષ્ટિએ જોઈએ તો માર્ચ-2020માં ગુજરાતમાં એ 8.1% હતો, જે અત્યારસુધીનો હાઈએસ્ટ આંક છે. જોકે અત્યારે પણ ગુજરાતની સ્થિતિ કાંઈ સારી તો છે જ નહીં. હાલ ગુજરાતનો ઈઋછ ભલે 1 ટકાની નીચે હોય, પરંતુ રાજ્યમાં કોરોનાનું એપિસેન્ટર બનેલો અમદાવાદ જિલ્લો 2.4નો ઈઋછ ધરાવે છે, જે 2500થી વધુ કોરોના મૃત્યુ ધરાવતા દેશના ટોચના 10 જિલ્લામાં પહેલા સ્થાને છે.