જામનગર નજીક લાલપુર બાયપાસ પાસેથી પસાર થતા છોટા હાથીને આંતરીને પોલીસે તલાસી લેતા તેમાંથી રૂા.2.94 લાખની દારૂની 588 બોટલ (49 પેટી) સાથે એક શખ્સને ઝડપી લઇ આગળની કાર્યવાહી હાથ ધરી હતી. જામનગર તાલુકાના બેડ ગામમાં રહેતા શખ્સના રહેણાં મકાનમાંથી પોલીસે રેઈડ દરમિયાન રૂા.18,675 ની કિંમતની 49 બોટલ દારૂ સાથે ચાર શખ્સોને ઝડપી લઇ આગળની કાર્યવાહી હાથ ધરી હતી.
દારૂના દરોડાની વિગત મુજબ, પ્રથમ દરોડો જામનગર નજીક લાલપુર બાયપાસ પાસેથી પસાર થતા જીજે-10-વાય-3145 નંબરના છોટા હાથી વાહનને આંતરીને પીએસઆઈ એસ.પી. સોઢા તથા સ્ટાફે તલાસી લેતા તેમાંથી રૂા.2,94,000 ની કિંમતની દારૂની 588 બોટલો (49 પેટી) મળી આવતા પોલીસે દારૂનો જથ્થો અને 1 લાખની કિંમતનું છોટા હાથી વાહન મળી કુલ રૂા.3.94 લાખનો મુદ્દામાલ કબ્જે કરી શાહનવાઝ ઉર્ફે ટોની દિલાવર દરજાદા નામના શખ્સની ધરપકડ કરી પૂછપરછ હાથ ધરતા આ દારૂના જથ્થામાં વસીમ યુસુફ દરજાદાની સંડોવણી ખુલ્લી હતી. જેના આધારે પોલીસે દારૂ અને વાહન કબ્જે કરી બે શખ્સો વિરૂધ્ધ ગુનો નોંધી વધુ તપાસ હાથ ધરી હતી.
બીજો દરોડો, જામનગર તાલુકાના બેડ ગામમાં રહેતાં વનરાજસિંહના મકાનમાં દારૂનો જથ્થો હોવાની એલસીબીના અજયસિંહ ઝાલા અને યશપાલસિંહ જાડેજાને મળેલી બાતમીના આધારે પીઆઈ એસ.એસ. નિનામા તથા સ્ટાફે રેઈડ દરમિયાન વનરાજસિંહ ઉર્ફે મુનિયો બાગડ શિવુભા જાડેજા, પ્રણવદિપસિંહ ઉર્ફે પાંચો ચંદ્રસિંહ જાડેજા, જીજ્ઞેશ ઉર્ફે દાઢી વિનોદરાય ખીચડા અને અજયસિંહ લગધીરસિંહ પરમાર નામના ચાર શખ્સોને રૂા.18,675 ની કિંમતની દારૂની 49 બોટલો અને રૂા.10,500 ની કિંમતના ત્રણ મોબાઇલ ફોન મળી કુલ રૂા.29,175 ના મુદ્દામાલ સાથે ઝડપી લઇ આગળની કાર્યવાહી હાથ ધરી હતી.
