જામનગર શહેર-જિલ્લામાં વધુ 115 દર્દીઓએ કોરોનાને માત આપી

જામનગર શહેર જિલ્લામાં કોરોના અજગરી ભરડો લઇ રહ્યો છે અને કોરોના મહામારીનું સંક્રમણ અનેક ગણી ઝડપે વધી રહ્યું છે. છેલ્લાં 24 કલાક દરમિયાન જામનગર શહેરમાં 43 અને ગ્રામ્યના 22 કેસ મળી 65 કેસ નોંધાયા છે. તો 115 દર્દીઓએ કોરોનાને હરાવવામાં સફળ રહેતા ડિસ્ચાર્જ કરવામાં આવ્યા છે. જામનગરમાં છેલ્લાં 24 કલાક દરમિયાન એક દર્દીઓનું મોત નિપજ્યા હોવાનું તંત્ર દ્વારા જાહેર કરવામાં આવ્યું છે. જામનગરમાં બિનસત્તાવાર રીતે કોવિડ થી -20 દર્દીના મોત નિપજ્યા છે.

ગુજરાત રાજ્ય સહિત સમગ્ર દેશમાં કોરોના સંક્રમણ ઘટતું જાય છે અને મૃત્યુનું પ્રમાણ પણ સાથે સાથે ઘટી રહ્યું છે. જે મહદઅંશે રાહત છે. જો કે, છેલ્લાં દશેક દિવસથી જામનગર સહિત સમગ્ર રાજ્યમાં કોરોના સંક્રમણ ધીમે ધીમે ઘટી રહ્યું છે અને આ સંક્રમણમાં પોઝિટિવ કેસો અને મૃત્યુઆંક ઘટતો જાય છે જ્યારે સાજા થનાર દર્દીઓની સંખ્યા વધી રહી છે જેથી સરકારી હોસ્પિટલોમાં હાલની પરિસ્થિતિમાં કોવિડના દર્દીઓની સંખ્યા ઘણી ઘટી ગઈ છે. જામનગરની જી.જી.હોસ્પિટલમાં છેલ્લાં બે સપ્તાહથી શહેર-જિલ્લામાં કોરોના પોઝિટિવ કેસોની સંખ્યામાં મહદઅંશે ઘટાડો થઈ જતાં એક માસ પૂર્વે દરરોજના 700 કેસોની સરખામણીએ આજે માત્ર 100 થી 125 કેસો જ પોઝિટિવ આવે છે અને કોવિડથી થતાં મૃત્યુનો આંકડો પણ ઘટી ગયો છે. અગાઉ દરરોજ આશરે 70 જેટલા દર્દીઓના કોવિડથી બિનસત્તાવાર મૃત્યુ થતાં હતાં.

જામનગર શહેરમાં છેલ્લાં 24 કલાક દરમિયાન 43 પોઝિટીવ કેસ સામે આવ્યા છે. જ્યારે 66 દર્દીઓએ કોરોનાને હરાવ્યો છે. આ ઉપરાંત જામનગર ગ્રામ્ય વિસ્તારમાં કુલ 22 પોઝિટીવ કેસ નોંધાયા છે. જ્યારે 49 દર્દીઓએ કોરોનાને મ્હાત આપતા ડિસ્ચાર્જ કરાયા છે. જામનગર શહેરમાં અત્યાર સુધીમાં કુલ 387820 સેમ્પલનું પરીક્ષણ થયું છે. જામનગર ગ્રામ્યમાં અત્યાર સુધીમાં કુલ 285382 સેમ્પલનું પરીક્ષણ થયું છે અને સત્તાવાર રીતે કુલ એક વ્યકિતનું કોરોનાથી મોત નિપજયું છે. જ્યારે છેલ્લાં 24 કલાક દરમિયાન જામનગરમાં 20 દર્દીઓના બિનસતાવાર મોત થી અરેરાટી ફેલાઈ ગઇ છે. આજની સ્થિતિએ જી.જી.હોસ્પિટલમાં કુલ 366 દર્દીઓ અને રિલાયન્સ હોસ્પિટલમાં 79 દર્દીઓ કોરોનાની સારવાર હેઠળ છે. જ્યારે મ્યુકોરમાઈકોસિસના 129 દર્દીઓ સારવાર હેઠળ હોસ્પિટલમાં છે.