જામનગરના ખોડિયાર કોલોનીમાં રહેતાં અને બાંધકામનો વ્યવસાય કરતાં પ્રૌઢને મકાનના કામ પેટે આપવાના રૂપિયા તથા ફોસલાવીને સાડા ચાર લાખ રૂપિયા પડાવી લઇ પરત ન આપી ત્રાસ આપતા દંપતીના ત્રાસથી ગળેફાંસો ખાઈ આત્મહત્યા કરી હતી.
આ અંગેની વિગત મુજબ, જામનગર શહેરના ખોડિયાર કોલોની સોનલનગર વિસ્તારમાં રહેતાં કાનજીભાઈ સોઢા નામના પ્રૌઢે ખોડિયાર કોલોનીમાં જ રહેતાં સુરેન્દ્રસિંહ બાલુભા સોઢા અને તેમના પત્ની રસીલાબા સુરેન્દ્રસિંહ સોઢા નામના દંપતીના મકાનના બાંધકામનું કામ રાખ્યું હતું. આ કામ પેટે 95730 ની રકમ ઉપરાંત કાનજીભાઈને ફોસલાવીને દંપતીએ રૂા. 4,30,000 લઈ લીધા હતાં. આ રકમ પ્રૌઢને પરત આપતા ન હતાં. તેમજ પ્રૌઢ દ્વારા રકમની માંગણી કરાતા દંપતીએ પ્રૌઢ સાથે ઝડઘો કરી ત્રાસ આપતા હોવાથી કંટાળીને કાનજીભાઈ સોઢા નામના પ્રૌઢે ગત તા. 18 ના રોજ ગળેફાંસો ખાઈ આત્મહત્યા કરી હતી. આ બનાવમાં મૃતકના પુત્ર નિલેશભાઈ સોઢા દ્વારા દંપતી વિરૂધ્ધ મરી જવા મજબુર કર્યાની ફરિયાદ નોંધાવતા પીએસઆઈ એલ.બી. જાડેજા તથા સ્ટાફે ગુનો નોંધી આગળની કાર્યવાહી હાથ ધરી હતી.
