પતિએ પીયર જવાની ના પાડતા પત્નીએ એસિડ ગટગટાવ્યું

કાલાવડ તાલુકાના બેડીયા ગામમાં રહેતી યુવતીને તેણીના પીયર જવાની પતિ એ ના પાડતા મનમાં લાગી આવતા તેણીના ઘરે એસિડ પી આપઘાત કર્યાના બનાવમાં પોલીસે તપાસ હાથ ધરી હતી.

બનાવની વિગત મુજબ, કાલાવડ તાલુકાના બેડીયા ગામમાં રહેતાં હરપાલસિંહ જાડેજા નામના ખેતીકામ કરતા યુવાનના પત્ની પ્રીતીબા હરપાલસિંહ જાડેજા (ઉ.વ.27) નામની યુવતીને તેણીના પીયરે આંટો મારવા જવું હોવાની પતિએ ના પાડતા આ બાબતનું મનમાં લાગી આવતા પ્રીતીબાએ ગત તા. 7 ના રોજ સવારના સમયે તેના ઘરે એસિડ પી જઇ આપઘાતનો પ્રયાસ કરતા સારવાર માટે હોસ્પિટલમાં ખસેડવામાં આવ્યાં હતાં. જ્યાં તેણીનું સારવાર દરમિયાન મંગળવારે બપોરે મોત નિપજ્યાનું તબીબોએ જાહેર કર્યુ હતું. આ અંગેની મૃતકના પતિ દ્વારા જાણ કરાતા ડીવાયએસપી કૃણાલ દેસાઈ તથા સ્ટાફે તપાસ હાથ ધરી હતી.