જામજોધપુર તાલુકાના સિદસર ગામે ઘણા સમયથી મેજરબ્રિજનું કામ ચાલી રહ્યું છે. જેની સમયમર્યાદા પૂર્ણ થઇ ગઇ હોવા છતાં આ કામ પૂર્ણ થયું નથી. તેમજ વ્યવસ્થાના ભાગરુપે નદી પર કોઝ-વે બનાવવામાં આવ્યો છે. જે ગત ચોમાસામાં સંપૂર્ણપણે ધોવાઇ ગયો હતો. જેને પણ ફરી બનાવવામાં ઘણો સમય લાગ્યો હતો. જેના કારણે વાહન ચાલકોને ભારે મુશ્કેલી વેઠવી પડી હતી.
આ રસ્તો જામનગર, સિદસર, પાનેલી, ઉપલેટા થઇ રાજકોટ જવાનો મુખ્ય રસ્તો છે. તેથી ચોમાસામાં પૂર આવતાં આ રસ્તો ફરી ધોવાઇ જવાની સંભાવના છે. આથી વાહન વ્યવહાર ન ખોરવાઇ તે માટે સિદસર મંદિર પાસે કાચો માર્ગ છે. તે વ્યવસ્થિત કરવા તેમજ મેજર બ્રિજનું કામ સમયસર અને વ્યવસ્થિત રીતે પૂર્ણ થાય તે માટે કાર્યવાહી કરવા માગણી કરાઇ છે.ળ આ ઉપરાંત જામજોધપુરથી વાલાસણ તરફનો રસ્તો પણ સિદસર બ્રિજ બંધ થતાં ફરીને જવા માટે ખૂબ જ મહત્વનો રસ્તો છે. જે રસ્તો પણ બિસ્માર હાલતમાં હોય તેને પણ તાત્કાલિક મરામત કરવા જામજોધપુરના ધારાસભ્ય ચિરાગભાઇ કાલરીયા દ્વારા માર્ગ મકાન વિભાગના મંત્રી પૂર્ણેશ મોદીને પત્ર લખી રજૂઆત કરી છે.
