જામનગરના ગ્રેઇનમાર્કેટ વિસ્તારમાં આવેલી દિપકકુમાર પ્રેમજીભાઈ નામની પેઢીના સંચાલક દિપકભાઈ નામના વેપારી દ્વારા ઈન્ડસઈન્ડ બેંકની આરટીજીએસ સેવા દ્વારા રાજસ્થાનના વેપારીને રૂા.7,19,440ની રકમ મોકલવામાં આવી હતી પરંતુ આ રકમ રાજસ્થાનના વેપારી શીવરતન સુનિલકુમાર મહેતાના ખાતામાં જમા નહીં આપતા જામનગરના વેપારીએ બેંકમાં ફરિયાદ કરી હતી. પરંતુ બેંક દ્વારા કોઇ કાર્યવાહી કરવામાં ન આવતા વેપારીએ ગ્રાહક તકરાર નિવારણ ફોરમમાં ફરિયાદ કરી હતી. જે કેસ ચાલી જતા ફોરમે બેંક વિરુધ્ધ હુકમ આપી રાજસ્થાનના વેપારીના ખાતામાં મોકલેલા નાણા જમા થયાનો પૂરાવો આપવા અન્યથા દિપકકુમારને તા.6/01/2015 થી વ્યાજ સહિત રૂા.7,19,440 જમા આપવાનો આદેશ કરાયો હતો.
ફોરમ દ્વારા કરાયેલા હુકમથી નારાજ થયેલ ઇન્ડસઈન્ડ બેંકે ગુજરાત રાજ્ય ગ્રાહક તકરાર નિવારણ કમિશન અમદાવાદમાં અપીલ કરી હતી. આ અપીલ એમ.જે. મહેતાની ફોરમે નીચલી કોર્ટના હુકમે યોગ્ય માની અને બેન્કને જામનગરના વેપારી દિપકકુમાર પ્રેમજીભાઈને રૂા.7,19,440 વ્યાજ સહિત ચૂકવી આપવાનો હુકમ કર્યો હતો. આ કેસમાં વેપારી દિપકકુમાર તરફથી ભોજાણી એસોસિએટસના ધારાશાસ્ત્રી પિયુષ વી. ભોજાણી, ભાવિન ભોજાણી, ભાવિન રાજદેવ, કિશોર ડી. ભટ્ટ, હેમલ વાઘાણી, સચિન જોશી, અલ્કાબેન નથવાણી, અર્શ કાસમાણી, ફેનિલ બથિયા રોકાયા હતાં.
