જામનગર જિલ્લાના પાંચ એસટી ડેપોમાં એપ્રેન્ટિસ તરીકે જોડાવાની તક

એસટી વિભાગ દ્વારા જામનગર ડિવિઝન અંતર્ગત આવતાં પાંચ એસટી ડેપોમાં આઇટીઆઇ પાસ ઉમેદવારને એપ્રેન્ટિસ તરીકે ભરતી કરવામાં આવશે આ માટે ઉમેદવારોને 30 સપ્ટેમ્બર સુધીમાં અરજી કરવાની રહેશે.

ગુ.રા.મા.વા.વ્ય નિગમ, જામનગર વિભાગની એપ્રેન્ટીસની મંજૂરી માટે જામનગર વિભાગ હેઠળના વિભાગીય કચેરી, વિભાગીય યંત્રાલય, વિભાગીય સ્ટોર્સ-જામનગર અને જામનગર/જામજોધપુર/ખંભાળિયા/દ્વારકા/ધ્રોલ -ડેપો ખાતે એપ્રેન્ટીસ એક્ટ-1961 અન્વયે ઓગસ્ટ-ઓક્ટોબર 2021ના ભરતી સત્ર માટે એપ્રેન્ટીસ ફીટર, ટર્નર, ઇલેક્ટ્રીશ્યન, વેલ્ડર(ગેસ અને ઇલેક્ટ્રિક) મોટર મિકેનિક, ડીઝલ મેકેનિક અને કોપા કુલ-7 ટ્રેડ હેઠળના આઇ.ટી.આઇ પાસ ઉમેદવારોની એપ્રેન્ટિસ તરીકે ભરતી કરવાની હોય ઉમેદવારોએ www.apprenticeshipindia.org પોર્ટલ પર રજિસ્ટ્રેશન કરી(આધારકાર્ડ ફરજિયાત વેરિફાઇડ કરવું) તેની પ્રિન્ટ (મેળવી), શૈક્ષણિક લાયકાતના તમામ પુરાવા (10પાસ/12પાસ અને આઇ.ટી.આઇ પાસ), એલ.સી., આધારકાર્ડ, જાતિના પ્રમાણપત્રની બે નકલ સાથે તા.28-09-2021 સુધીમાં આ માટેનું અરજીપત્રક મેળવી લેવા તથા ઉમેદવારોએ અરજીપત્રક તા.30-09-2021 સુધીમાં તમામ અસલ માર્કશીટ/પ્રમાણપત્રો સાથે રાખી તેની રૂબરૂમાં ચકાસણી કરાવી ભરાયેલા અરજીપત્રકો જમા કરાવવાના રહેશે. આ માટે વધુ વિગતો મેળવવા વહીવટી શાખા, વિભાગીય નિયામકની કચેરી, જામનગર વિભાગ, કાલાવડ નાકા બહાર, જામનગર ખાતે રૂબરૂ સંપર્ક સાધવા વિભાગીય નિયામક એસ.ટી. જામનગરની યાદી દ્વારા જણાવવામાં આવ્યું છે.