અમૃત ભારત રેલવે સ્ટેશન યોજના અંતર્ગત રાજકોટ રેલવે ડિવિઝન હેઠળના જામનગર જિલ્લાના હાપા-કાનાલૂસ અને જામવણથલી સહિતના કુલ છ રેલવે સ્ટેશનના પુનર્વિકાસની કામગીરી પૂર્ણ થઈ છે. ત્યારે આજરોજ વડાપ્રધાન નરેન્દ્ર મોદીના હસ્તે વીડિયો કોનફરન્સના માધ્યમથી લોકાર્પણનો કાર્યક્રમ યોજાયો હતો.
અમૃત ભારત સ્ટેશન યોજના હેઠળ રાજકોટ રેલવે ડિવિઝનના કુલ સત્તર રેલવે સ્ટેશનોનો પુનર્વિકાસ થઈ રહ્યો છે. જે પૈકી હાલમાં કુલ છ રેલવે સ્ટેશનોના પુનર્વિકાસની કામગીરી પૂર્ણ થઈ ગઈ છે, જેમાં જામનગર જિલ્લાના હાપા, જામવણથલી, કાનાલુસ ઉપરાંત દેવભૂમિ દ્વારકા જિલ્લાના ઓખા અને મીઠાપુરનો સમાવેશ થાય છે. આ તમામ રેલવે સ્ટેશનોનું વિડિયો કોન્ફરન્સના માધ્યમથી લોકાર્પણ ભારતના વડાપ્રધાન નરેન્દ્ર મોદીના હસ્તે કરવામાં આવ્યું હતું.
અમૃત ભારત સ્ટેશન યોજના હેઠળ વિકસાવવામાં આવી રહેલા 1300થી વધુ સ્ટેશનોમાં જે 103 સ્ટેશન હમણાં જ બનીને તૈયાર થયા છે. આ સ્ટેશનો પર પ્રવેશદ્વાર, આકર્ષક ફસાડ, હાઈ માસ્ટ લાઈટિંગ, આધુનિક પ્રતિક્ષાલય, ટિકિટ કાઉન્ટર, મોર્ડન ટોયલેટ અને દિવ્યાંગજનો માટે સુગમ રેમ્પ જેવી સુવિધાઓ વિકસાવવામાં આવી છે.
પ્લેટફોર્મ પર શેલ્ટર, કોચ ઈન્ડિકેશન સિસ્ટમ અને માહિતી માટે ડિજિટલ ડિસ્પ્લે લગાવવામાં આવ્યા છે. તમામ સુવિધાઓને દિવ્યાંગજન અનુકૂળ બનાવવામાં આવી છે. દરેક સ્ટેશન પર ગુજરાતની લોકકલા, સંસ્કૃતિ અને પરંપરાઓની ઝલક પણ જોવા મળી રહી છે. હાપા રેલ્વે સ્ટેશનનો પુનર્વિકાસ ₹12.79 કરોડના ખર્ચે સાવચેતીપૂર્વક આયોજન અને અમલીકરણ દ્વારા કરવામાં આવ્યો છે. એક સમયે એક સામાન્ય સ્ટેશન હવે વિકસી રહેલા રેલ માળખાકીય સુવિધાઓનું પ્રતીક બની ગયું છે.
સ્ટેશનની ઇમારતમાં દૃશ્ય અને કાર્યાત્મક પરિવર્તન થયું છે. એક નવનિર્મિત પ્રવેશદ્વાર પોર્ચ, મુસાફરોને લેવા અને છોડવા માટે એક સુરક્ષિત વિસ્તાર પ્રદાન કરીને, આગળના ભાગને એક ભવ્ય અને સ્વાગતપૂર્ણ દેખાવ આપે છે. આ સ્થાપત્ય અપગ્રેડને વાતાનુકૂલિત અને સામાન્ય પ્રતિક્ષા ખંડોના ઉમેરા દ્વારા પૂરક કરવામાં આવ્યો છે જે વિશાળ, આરામદાયક અને વધેલી મુસાફર સુવિધા માટે ડિઝાઇન કરવામાં આવ્યા છે.
પ્લેટફોર્મ નંબર 1 અને 2 બંને પર પ્લેટફોર્મ સપાટીકરણમાં વ્યાપક સુધારો છે. આ અપગ્રેડ ખાસ કરીને વૃદ્ધ મુસાફરો અને સામાન લઈ જનારા મુસાફરો માટે સરળ બોર્ડિંગ સુનિશ્ચિત કરે છે. આ ઉપરાંત, મુસાફરો માટે પૂરતો છાંયડો પૂરો પાડતા નવા કવરશેડનું નિર્માણ કરવામાં આવ્યું છે, જેનાથી વ્યસ્ત સમય દરમિયાન આરામ અને ભીડ વ્યવસ્થાપનમાં નોંધપાત્ર સુધારો થયો છે. આધુનિક, સુવ્યવસ્થિત શૌચાલય બ્લોક્સ પણ શરૂ કરવામાં આવ્યા છે, જે તમામ મુસાફરો માટે સ્વચ્છતા અને ઉપયોગમાં સરળતા સુનિશ્ચિત કરે છે.
આ લોકાર્પણ કાર્યક્રમમાં હાપા રેલવે સ્ટેશન ખાતે હાલારના સાંસદ પૂનમબેન માડમ, મેયર વિનોદભાઇ ખીમસૂર્યા, જામનગર ઉત્તરના ધારાસભ્ય રીવાબા જાડેજા, જામનગર દક્ષિણના ધારાસભ્ય દિવ્યેશભાઇ અકબરી, ડેપ્યુટી મેયર ક્રિષ્નાબેન સોઢા, સ્ટે. કમિટીના ચેરમેન નિલેશભાઇ કગથરા, શાસક પક્ષના નેતા આશિષભાઇ જોશી, નગર પ્રાથમિક શિક્ષણ સમિતિના ચેરમેન પરસોત્તમભાઇ કકનાણી, શહેર ભાજપ પ્રમુખ બીનાબેન કોઠારી, જિલ્લા ભાજપ પ્રમુખ ડો. વિનોદભાઇ ભંડેરી, રાજકોટ રેલવે ડિવિઝનના ડીવીઝનલ રેલ્વે મેનેજર સહિતના અગ્રણીઓ તથા રેલવેના અધિકારીઓ, કર્મચારીઓ ઉપસ્થિત રહ્યાં હતાં.
