મુંબઈના જિયો વર્લ્ડ કન્વેન્શન સેન્ટરમાં 13 ફેબ્રુઆરીએ મહિલા આઈપીએલ માટે ખેલાડીઓની હરાજી થશે. બીસીસીઆઈના સૂત્રોએ આ અંગેની સ્પષ્ટતા કરી છે. ફ્રેન્ચાઈઝીઓના અનુરોધ બાદ બીસીસીઆઈએ આ તારીખ નક્કી કરી છે. ક્રિકબઝના અહેવાલ પ્રમાણે ભારતીય ક્રિકેટ કંટ્રોલ બોર્ડને તારીખ અને સ્થળ અંગે નિર્ણય લેવામાં થોડો સમય લાગી ગયો હતો.
બીસીસીઆઈએ નિર્ણય લેતા પહેલાં અમુક મુખ્ય મુદ્દે વિચાર-વિમર્શ કર્યો હતો જેમાં એક મુદ્દો એવો પણ હતો કે અત્યારે લગ્નોની સીઝન ચાલી રહી હોવાથી હરાજી માટે હોટેલ મળી રહી ન હોવાથી હરાજીનું આયોજન કઈ જગ્યા પર કરવું તે પણ હતો. આ ઉપરાંત મહિલા આઈપીએલની બોલી જીતનારી અનેક ફ્રેન્ચાઈઝીઓ પહેલાંથી જ અન્ય લીગમાં વ્યસ્ત હોવાથી તેઓ હરાજીમાં ઉપલબ્ધ રહી શકશે કે કેમ ? ફ્રેન્ચાઈઝીઓએ બીસીસીઆઈને અનુરોધ કર્યો હતો કે આઈટીએલ-20ના ફાઈનલ બાદ હરાજીની તારીખ નક્કી કરવામાં આવે જેનો બીસીસીઆઈએ સ્વીકાર કર્યો હતો.
બીજી બાજુ મહિલા ટી-20 વર્લ્ડકપને ધ્યાનમાં રાખી બીસીસીઆઈએ મહિલા પ્રિમીયર લીગ માટે હરાજીની તારીખ 13 ફેબ્રુઆરીએ નિર્ધારિત કરી છે. ઉલ્લેખનીય છે કે બાંદ્રા-કુર્લા કોમ્પલેક્સમાં આવેલા જિયો વર્લ્ડ ક્ધવેનશન સેન્ટર એક વિશાળ ઈમારત છે જે એક સાંસ્કૃત્તિક કેન્દ્ર છે. આ બિલ્ડિંગમાં એક સાથે અનેક કાર્યક્રમ આયોજિત કરી શકાય છે. બીસીસીઆઈના એક અધિકારીએ સ્પષ્ટતા કરી છે કે બોર્ડ હરાજીને સેન્ટ્રલમાં યોજવાનો વિકલ્પ ચકાસી રહ્યું છે.
