જામનગરની જી.જી. હોસ્પિટલમાં ફરી એક વખત શ્વાનનો આતંક સામે આવ્યો છે, જે હોસ્પિટલની સુરક્ષા વ્યવસ્થાને લઈને ગંભીર સવાલો ઉભા કરે છે. સારવાર માટે આવી રહેલા દર્દીઓ માટે હોસ્પિટલ એક સુરક્ષિત જગ્યા હોવી જોઈએ, પરંતુ છેલ્લા કેટલાક સમયથી અહીં શ્વાન અને અન્ય પશુઓ નિર્ભય રીતે અંદર ઘૂસી આવતા હોવાના બનાવો સતત બનતા રહેતા થયા છે, ફરી બનાવ સામે આવ્યો છે કારણ કે સારવાર માટે આવેલા વૃદ્ધ દર્દી પર સીધો હુમલો થયો છે.
શહેરના રણજીતનગરમાં રહેતા શ્યામભાઈ સિંધી નામના વૃદ્ધને મોઢાના ભાગે કેન્સરનું નિદાન થતાં તેઓ જી.જી. હોસ્પિટલમાં સારવાર માટે આવ્યા હતા. તેઓ સારવાર પૂરું કરીને કેસ બારીની સામેના ભાગેથી બહાર નીકળતા હતા ત્યારે અચાનક એક ઘુરાયેલા શ્વાને તેમની તરફ દોડી જઈ તેમના હાથમાં બચકું ભરી લીધું. આ હુમલો એટલો અચાનક અને જોરદાર હતો કે વૃદ્ધ લોહીલુહાણ થઈ ગયા અને કેટલાક સેકન્ડ માટે તેમને ખબર પણ ન પડી કે શું થયું. ઘટનાના થોડા જ પળોમાં ત્યાં હાજર દર્દીઓ, તેમના સગા-સંબંધીઓ અને સ્ટાફમાં ભારે ભય અને અફરાતફરી મચી ગઈ હતી. લોકો એકબીજા તરફ દોડતા થયા અને શ્વાનને દૂર હંકારવાનો પ્રયત્ન કર્યો.
વૃદ્ધ વ્યક્તિએ તરત જ પરિવારજનોને ફોન કરીને જાણ કરી અને હોસ્પિટલ સ્ટાફ દ્વારા તેમને તાત્કાલિક સારવાર આપવામાં આવી. તેમના હાથમાં ઘાવ થતા લોહી વહેતા હોવાથી સ્ટાફે તાત્કાલિક ડ્રેસિંગ કરી અને જરૂરી દવાઓ આપી. આ બનાવ બાદ વૃદ્ધ દર્દી માનસિક રીતે પણ ગભરાઈ ગયા હતા, કારણ કે સારવાર માટે આવેલ વ્યક્તિ પર હોસ્પિટલની અંદર જ આ પ્રકારનો હુમલો થવો કોઈ સામાન્ય બાબત નથી.
આ સમગ્ર ઘટનાએ હોસ્પિટલની સુરક્ષા વ્યવસ્થા અંગે નવા પ્રશ્નો ઊભા કર્યા છે. સિક્યોરિટી ગાર્ડને દર મહિને લાખો રૂપિયાના પગાર ચૂકવવામાં આવે છે, તેમ છતાં શ્વાન સહેલાઈથી હોસ્પિટલ સુધી ઘૂસી આવે છે, જે ગંભીર બેદરકારી દર્શાવે છે. દર્દીઓના જીવન માટે જોખમી સાબિત થઈ શકે એવા આવા બનાવો સામે હવે હોસ્પિટલ મેનેજમેન્ટે કેટલી અસરકારક પગલાં લે છે તે જોવું રહ્યું. દર્દીઓ અને તેમના સગાઓ માટે સુરક્ષા સુનિશ્ચિત કરવા તંત્રએ તાત્કાલિક અને કડક કાર્યવાહી કરવાની જરૂરિયાત ઉભી થઈ ગઈ છે.
