ખંભાળિયા નજીક બાઇક સ્લીપ થતા વડત્રાના યુવાનનું મૃત્યુ

ખંભાળિયા નજીક બાઈક આડે કુતરુ આડુ ઉતરતા બાઈક સ્લીપ થતા યુવાનનું મૃત્યુ થયું હતું. પોલીસ દ્વારા આ અંગે વધુ કાર્યવાહી હાથ ધરવામાં આવી હતી.

આ અંગેની વિગત મુજબ, ખંભાળિયા તાલુકાના વડત્રા ગામે રહેતા ભિમશીભાઈ દેવાતભાઈ જોગલ નામના 22 વર્ષના યુવાન ગત તા. 19 ડિસેમ્બરના રોજ પોતાના જીજે-10 સી.કે. 1009 નંબરના મોટરસાયકલ પર બેસીને જઈ રહ્યા હતા, ત્યારે તેમના બાઈક આડે એકાએક કુતરુ આવી જતા ભિમશીભાઈનું મોટરસાયકલ સ્લીપ થઈ ગયું હતું. આ અકસ્માતમાં તેમને માથાના ભાગે ગંભીર ઇજાઓ થતા તેમનું મૃત્યુ નીપજ્યું હતું. આ બનાવની જાણ મૃતકના પિતા દેવાતભાઈ અરશીભાઈ જોગલે પોલીસને કરતા પોલીસ દ્વારા મૃતદેહને પીએમ માટે ખસેડી વધુ કાર્યવાહી હાથ ધરી હતી.