Connect with us

રાજ્ય

રાજ્યમાં એક વર્ષમાં આટલા રાહદારીઓ યમધામ પહોંચી ગયા

ખબર ગુજરાત

પ્રકાશિત

on

ગુજરાતમાં વાહનની ટક્કર થવાથી રાહદારીઓના મૃત્યુ થવાના પ્રમાણમાં ચિંતાજનક રીતે વધારો થઇ રહ્યો છે. માત્ર એક વર્ષમાં 728 રાહદારીઓના મૃત્યુ થયા છે. આ સ્થિતિએ ગુજરાતમાં દરરોજ સરેરાશ બે રાહદારીના મૃત્યુ થઇ રહ્યા છે. વધુ ચિંતાજનક વાત એ છે કે ગત વર્ષે થયેલા 728 રાહદારીઓના મૃત્યુ એ છેલ્લા 10 વર્ષમાં સર્વોચ્ચ છે. ગુજરાતમાંથી છેલ્લા પાંચ વર્ષમાં 2880 રાહદારીઓના મૃત્યુ થયા છે.

એનસીઆરબી દ્વારા જારી કરવામાં આવેલી વિગતો અનુસાર સમગ્ર દેશમાંથી વર્ષ 2019માં 11786 રાહદારીઓના મૃત્યુ થયા છે. જેમાં મહારાષ્ટ્રમાંથી સૌથી વધુ 1489, કર્ણાટકમાંથી 1288, તમિલનાડુમાંથી 1044, કેરળમાંથી 902 રાહદારીઓએ જીવ ગુમાવ્યો છે. એક વર્ષમાં સૌથી વધુ રાહદારીઓના મૃત્યુ થયા હોય તેવા રાજ્યોમાં ગુજરાત આઠમાં સ્થાને છે. વર્ષ 2019માં ગુજરાતના જે મોટા શહેરોમાંથી સૌથી વધુ રાહદારીઓના મૃત્યુ થયા હોય તેમાં સુરત 78 સાથે મોખરાનું સ્થાન ધરાવે છે. આ સિવાય અમદાવાદમાંથી 53, વડોદરામાંથી 47, રાજકોટમાંથી 28 રાહદારીઓના મૃત્યુ થયેલા છે. ગુજરાતમાંથી એક વર્ષમાં રસ્તો ઓળંગતી વખતે 95ના મૃત્યુ થયેલા છે. જેમાં 74 પુરુષ-20 મહિલા અને 1 ટ્રાન્સજેન્ડરનો સમાવેશ થાય છે. શહેરી વિસ્તારમાં રસ્તો ઓળંગતી વખતે તમિલનાડુમાંથી સૌથી વધુ 1044ના જ્યારે સમગ્ર દેશમાંથી 3121ના મૃત્યુ થયેલા છે.

શહેરી વિસ્તારમાં રસ્તો ઓળંગતી વખતે અમદાવાદમાંથી 40 પુરુષ-12 મહિલા-1 ટ્રાન્સજેન્ડર એમ કુલ 53ના, રાજકોટમાંથી 25 પુરુષ-6 મહિલા એમ 31ના, સુરતમાંથી 4 પુરુષ-1 મહિલા એમ 5ના, જ્યારે વડોદરામાંથી એકપણના રસ્તો ઓળંગતી વખતે મૃત્યુ થયા નથી. અમદાવાદમાં થયેલા 53ના મોત છેલ્લા 10 વર્ષમાં સૌથી વધુ છે. રાહદારીઓના સૌથી વધુ મોત મહાનગરો કરતાં નગરોમાં વધારે થઇ રહ્યા છે.  કેમકે, રાહદારીઓના કુલ થયેલા 728 મૃત્યુમાંથી 206 એટલે કે 30% જ અમદાવાદ-સુરત-વડોદરા-રાજકોટમાંથી છે. તજજ્ઞાોના મતે, ગુજરાતમાં રાહદારીઓની સલામતી માટે પૂરતા પગલાં લેવામાં આવી રહ્યા નથી તે સ્પષ્ટ બાબત છે. મોટાભાગના રસ્તામાં ઝીબ્રા ક્રોસિંગની નિશાની પણ ઝાંખી પડી ચૂકી હોય છે.  આ ઉપરાંત રાહદારીઓ માટે ફૂટ ઓવર બ્રિજ જેવી વ્યવસ્થાનો અભાવ પણ તેમને નડી રહ્યો છે.

ગુજરાતમાં છેલ્લા પાંચ વર્ષમાં રાહદારીઓના મૃત્યુ

વર્ષ મૃત્યુ
2019 728
2018 660
2017 598
2016 492
2015 402
કુલ 2880

વર્ષ 2019માં કયા શહેરમાં સૌથી વધુ રાહદારીના મોત?

શહેર મૃત્યુ
સુરત 78
અમદાવાદ 53
વડોદરા 47
રાજકોટ 28

રાજ્ય

આવકના દાખલામાં વ્યાપક ભૂલો હોવાના આક્ષેપ સાથે એનએસયુઆઇ દ્વારા વિરોધ

કલ્યાણપુરમાં આવેદનપત્ર પાઠવ્યું

ખબર ગુજરાત

પ્રકાશિત

on

કલ્યાણપુર તાલુકામાં અપાતા આવકના દાખલામાં ભૂલ હોવાના આક્ષેપો સાથે એન.એસ.યુ.આઈ. દ્વારા તાલુકા વિકાસ અધિકારીને આવેદન આપવામાં આવ્યું હતું.
કલ્યાણપુર તાલુકામાં આવકના દાખલામાં ભૂલોના કારણે વિદ્યાર્થીઓનું ભવિષ્ય બગડતું હોવાનું જણાવી, આ મામલે એન.એસ.યુ.આઈ. દ્વારા રજુઆત કરાઈ હતી. આવકના દાખલામાં વિવિધ પ્રકારની ભૂલો ધ્યાને આવતા એન.એસ.યુ.આઈ. દ્વારા આ અંગે ઉગ્ર રજુઆત કરવામાં આવી હતી.
અધિકારીઓ લાજવાના બદલે ગાજતા હોવાનો આક્ષેપ પણ કરવામાં આવ્યો હતો. તેઓ દ્વારા ભૂલ સ્વીકારવાના બદલે રોષે ભરાયા હતા. પોતાની ભુલનો સ્વીકાર કરવાના બદલે અધિકારીએ જણાવ્યું હતું કે કામનું ભારણ હોઈ બીજા ભૂલો કરે છે તો અમે શુ કરીએ? તેમ જણાવી, અધિકારીઓ જવાબદારીમાંથી છટકતા હોવાનો આક્ષેપ એન.એસ.યુ.આઈ. દ્વારા કરવામાં આવ્યો છે.
આ મામલે એન.એસ.યુ.આઈ. દ્વારા 72 કલાકનું અલ્ટીમેટમ અપાયું હતું. જો યોગ્ય નિરાકરણ નહીં આવે તો ગાંધી ચીંધ્યા માર્ગે જવાની આપી ચીમકી આપવામાં આવી હતી.
આ કાર્યક્રમમાં જિલ્લા એન.એસ.યુ.આઈ.ના પ્રમુખ દાનાભાઇ માડમની આગેવાની હેઠળ કેસુર વારોતરીયા, તુષાર હાથલીયા, જયેશ કંડોરીયા, સાગર ગોજીયા, ભાયા ભાદરકા, સાહિલ ગોસાઈ સહીતના કાર્યકરો જોડાયા હતા.

વધુ વાંચો

રાજ્ય

દ્વારકા જિલ્લાના સૌથી મોટી ઉંમર 84 વર્ષના દાદીએ કોરાનાને આપી મ્હાત

દ્વારકા જિલ્લાના સૌથી મોટી ઉંમર 84 વર્ષના દાદીએ કોરાનાને આપી મ્હાત

ખબર ગુજરાત

પ્રકાશિત

on

ખંભાળિયામાં રાવલ ચોક ખાતે રહેતા પાલિકાના પૂર્વ ચીફ ઓફિસર સ્વ. મહેશભાઈ શુકલના પત્ની શારદાબેન મહેશભાઈ શુકલ (ઉં.વ. 84) ને ગત્ તા. 2 સપ્ટેમ્બરના રોજ કોરાના પોઝીટીવ હોવાનું જાહેર થયું હતું.
આથી તેમને સિવિલ હોસ્પિટલના કોવિડ વોર્ડમાં દાખલ કરવામાં આવ્યા હતા. તેમની તબિયત વધુ બગડતા તેમને જામનગરની જી.જી. હોસ્પિટલમાં ખસેડવામાં આવ્યા હતા.
ડાયાબીટીસ, બ્લડપ્રેશર, ઓક્સિજન કમી વિગેરેની તેમને  22 દિવસની વિવિધ પ્રકારની સારવાર ખુબજ કાળજીપૂર્વક કરવામાં આવતા કોરાનાને મહાત આપી, સ્વસ્થ થતા શારદાબેનને ડિસ્ચાર્જ કરવામાં આવતા મંગળવારે ખંભાળિયામાં તેમના નિવાસસ્થાને લાવવામાં આવ્યા હતા. જ્યાં તેમના સગા- સંબંધીઓ, લતાવાસીઓ દ્વારા તેમના પર પુષ્પવૃષ્ટિ કરી, તાળી અને થાળી વગાડીને શારદાબેનની હિંમતને વધાવી હતી.
શારદાબેન શુક્લએ તેમના પ્રતિભાવમાં ખંભાળિયા અને જામનગર સરકારી હોસ્પિટલના તમામ ડોક્ટર તથા નર્સિંગ સ્ટાફને ભગવાન સ્વરૂપ ગણાવી આભાર વ્યક્ત કર્યો હતો.

વધુ વાંચો

રાજ્ય

ખંભાળિયાના રહેણાંક મકાનમાં દાગીના તથા રોકડ રકમની ઘરફોડ ચોરી

ખંભાળિયાના રહેણાંક મકાનમાં દાગીના તથા રોકડ રકમની ઘરફોડ ચોરી

ખબર ગુજરાત

પ્રકાશિત

on

ખંભાળિયાના યોગેશ્વરનગર વિસ્તારમાં એક મંદિરની બાજુમાં રહેતા અને મૂળ સુરેન્દ્રનગર જિલ્લાના થાનગઢ તાલુકાના વતની એવા હસમુખભાઈ મનજીભાઈ પરમાર નામના 43 વર્ષીય યુવાન ગત તારીખ 24 થી 27 સપ્ટેમ્બર સુધીના સમયગાળામાં પ્રસંગ અર્થે તેમના વતન ગયા હતા, અને પાછળથી કોઈ અજાણ્યા શખ્સોએ તેમના રહેણાંક મકાનની બારીની લોખંડની ગ્રીલ તોડી અને મકાનમાં ગેરકાયદેસર રીતે પ્રવેશ કર્યો હતો.
આ મકાનના રૂમની અંદર રહેલા કબાટની તિજોરી તોડી, તેમાં રાખવામાં આવેલા રૂપિયા દસ હજાર રોકડા તથા રૂપિયા પંદર હજારની કિંમતના ચાંદીના દાગીના મળી, કુલ રૂપિયા 25 હજારનો મુદ્દામાલ તસ્કરો ચોરી કરીને લઈ ગયા હોવાનું જાહેર થયું છે.
આ બનાવ અંગે પોલીસે હસમુખભાઈ પરમારની ફરિયાદ પરથી ધોરણસર ગુનો નોંધી પી.એસ.આઇ. અનિરુદ્ધસિંહ ઝાલાએ તસ્કરોની શોધખોળ હાથ ધરી છે.

વધુ વાંચો
Advertisement

ટ્રેન્ડીંગ