જામનગર શહેરના કાલાવડ નાકા બહાર મોરકાંડા રોડ રબ્બાની પાર્કમાં રહેતા અને ડ્રાઈવીંગનો ધંધો કરતા યુવકે અગાઉ એક શખ્સ પાસેથી વ્યાજે રૂપિયા લીધેલ હોય અને ચુકવવાના બાકી હોવાથી શખ્સોએ ઉઘરાણી કરતા યુવકે ડરીને શરીરે ડીઝલ છાંટી આત્મહત્યાનો પ્રયાસ કરતા તેને હોસ્પિટલમાં ખસેડવામાં આવ્યા છે.

આ બનાવની પ્રાપ્ત વિગતો મુજબ જામનગરના કાલાવડ નાકા બહાર મોરકાંડા રોડ રબ્બાની પાર્કમાં રહેતા અને ડ્રાઈવીંગનો ધંધો કરતા આશીફભાઈ આમદભાઈ ડોર નામના યુવકે અગાઉ આરોપી અસલમ શેખ પાસેથી વ્યાજે રૂપિયા લીઘા હતા. જેમાંથી ત્રણ હજાર રૂપિયા ચુકવવાના બાકી હોવાથી અસલમ યાસીન તથા અહેમદ બોદુએ યુવકને ફોન કરી ઘરની બહાર બોલાવી રૂપિયાની ઉઘરાણી કરતા ફરિયાદીએ રૂપિયાની સગવડ ન હોવાથી હાલ રૂપિયા નહિ આપું તેમ કહેતા બન્ને આરોપીઓએ ગાળો દઇ ઢીંકાપાટુનો માર મારી ધમકી આપી પૈસા પરત નહી આપે તો મારી નાખવાની ધમકી આપતા બળજબરી પૂર્વક ઉઘરાણી કરતા ફરિયાદીને ડર લાગતા તેણે આ પગલું ભરી લીધું હોવાનું સામે આવ્યું છે. સીટી એ ડીવીઝન પોલીસે આ અંગે બન્ને આરોપી વિરુધ ગુન્હો નોંધી આગળની કાર્યવાહી હાથ ધરી હતી.

જામનગર જિલ્લા તથા તાલુકા પંચાયતોની ચૂંટણી માટે ઉમેદવારો પસંદ કરવા ભાજપ દ્વારા ગઇકાલે દરેક તાલુકા મથકોએ સેન્સ પ્રક્રિયા હાથ ધરવામાં આવી હતી. આ માટે તાલુકાવાઇઝ 3-3 નિરીક્ષકોની ટુકડી બનાવવામાં આવી હતી. આ સેન્સ પ્રક્રિયા દરમ્યાન જિલ્લા અને તાલુકા પંચાયતોની કુલ 136 બેઠકો માટે 537 મુરતિયાઓએ પોતાનો દાવો નોંધાવ્યો હતો. આ ઉપરાંત સિકકા નગરપાલિકાની 28 બેઠક માટે પણ 74 દાવેદાર નોંધાયા હતા.

ભાજપ દ્વારા બુધવારે દરેક તાલુકા મથકોએ ઉમેદવાર પસંદગી માટે સેન્સ પ્રક્રિયા હાથ ધરવામાં આવી હતી. નિરીક્ષકો દ્વારા હાથ ધરાયેલી આ પ્રક્રિયામાં ધ્રોલ તાલુકા પંચાયતની 16 બેઠક માટે 53 જોડિયાની 16 બેકઠ માટે 59, જામજોધપુરની 18 બેઠક માટે 78, લાલપુરની 18 બેઠક માટે 65, જામનગરની 26 બેઠક માટે 91 તથા કાલાવડ તાલુકાની 18 બેઠક માટે 67 ઉમેદવારોએ પોતાની દાવેદારી પક્ષના નિરીક્ષકો સમક્ષ રજૂ કરી હતી. આમ તાલુકા પંચાયતોની કુલ 11ર બેઠક માટે 413 દાવેદારો નોંધાયા હતા. આ ઉપરાંત જામનગર જિલ્લા પંચાયતની 24 બેઠક માટે પણ સેન્સ લેવામાં આવી હતી. જિલ્લા પંચાયત માટે ભાજપની ટિકીટ મેળવવા 124 લોકોએ દાવેદારી નોંધાવી હતી.

બીજી તરફ જામનગર જિલ્લામાં એકમાત્ર સિકકા નગરપાલિકાની ચૂંટણી પણ યોજાવા જઇ રહી છે ત્યારે સિકકા પાલિકાની 28 બેઠક માટે નિરીક્ષકો દ્વારા હાથ ધરાયેલી ઉમેદવાર પસંદગીની પ્રક્રિયામાં કુલ 74 લોકોએ ટિકીટ માટે દાવેદારી નોંધાવી હતી.

આવતીકાલથી સંસદના બજેટ સત્રનો પ્રારંભ થાય છે. આ સત્ર દરમ્યાન જામનગરના સંસદસભ્ય પૂનમબેન માડમ નવી દિલ્હીમાં ઉપસ્થિત હોવાથી તા.29/01/2021 થી તા.15/02/2021 સુધી બજેટ સત્રના પ્રથમ તબકકા દરમ્યાન કામકાજના દિવસોમાં જામનગરમાં મળી શકશે નહી. સંસદના બજેટ સત્ર દરમ્યાન જામનગર જિલ્લામાં જામનગર ખાતે અને દેવભૂમિ દ્રારકા જિલ્લામાં ખંભાળીયા ખાતે સંસદસભ્યના કાર્યાલય સવારે : 9.30 થી રાત્રે : 8.30 સુધી રાબેતા મુજબ નિયમીત રીતે કાર્યરત રહેશે. જામનગર કાર્યાલય : નિયો સ્કવેર, ગ્રાઉન્ડ ફલોર, અંબર સીનેમા પાસે, જામનગર (ફોન. 0288-2676688, 2670100, ખંભાળીયા કાર્યાલય : પોસ્ટ ઓફિસ રોડ (ફોન. 02833-233388) નો સંપક કરવા સંસદસભ્ય કાર્યાલયની યાદીમાં જણાવ્યું છે.