Connect with us

રાજ્ય

આવકના દાખલાની મુદ્દત 1 વર્ષ લંબાવાઇ

આવકના દાખલાની મુદ્દત 1 વર્ષ લંબાવાઇ

ખબર ગુજરાત

પ્રકાશિત

on

રાજ્યના લાખો યુવાનો, વિદ્યાર્થીઓ, બાળકો, વાલીઓ માટે મુખ્યમંત્રીએ મહત્વપૂર્ણ નિર્ણય કરતા SEBC વર્ગો માટેના જાતિના પ્રમાણપત્ર- આવકના દાખલાની મુદત 1 વર્ષ સુધી વધારી આપવાની જાહેરાત કરી છે. જે યુવાનોના આ પ્રકારના દાખલા અને પ્રમાણપત્રની મુદ્દત 31 માર્ચે પૂરી થઇ ગઇ છે તે દાખલાઓ હવે 31 માર્ચ 2021 સુધી માન્ય રાખવામાં આવશે. રાજ્ય સરકાર દ્વારા કરવામાં આવેલા આ નિર્ણયથી 17 લાખી વધુ લાભાર્થીઓને લાભ મળશે.

SEBC માટેના નોન ક્રિમીલીયર સર્ટીફિકેટ, આવક દાખલાની સમયમર્યાદા ૩ વર્ષની હોય છે. તેથી મુખ્યમંત્રીએ એવો પણ નિર્ણય કર્યો છે કે આવા જે નોન ક્રિમીલીયર પ્રમાણપત્રોની સમયમર્યાદા 31 માર્ચ 2020ના પૂર્ણ થતી હોય તે આપોઆપ  31-3-2021 સુધી એટલે કે એક વર્ષ માટે વધારી દેવાશે. આ મુદત વધારા માટે તેમણે મામલતદાર કચેરી કે કોઇ સક્ષમ સત્તાધિકારી સમક્ષ જવાની કે ઓનલાઇન અરજી કરવાની જરૂર રહેશે નહીં. મુખ્યમંત્રીના આ નિર્ણયને પરિણામે આવકના દાખલા માટે રાજ્યના 13 લાખ 92 હજાર અને નોન ક્રિમીલીયર સર્ટીફિકેટ માટે 2 લાખ 98 હજાર લાભાર્થીઓ મળી 17 લાખ જેટલા લોકોને લાભ થશે.

લોકડાઉન બાદ હવે નવા શૈક્ષણિક વર્ષની શરૂઆત થતાં આવા લાખો યુવાઓને નોન ક્રિમીલીયર સર્ટીફિકેટના દાખલા મેળવવા મામલતદાર કચેરી કે સરકારી કચેરીએ જવું નહીં પડે અને  31 માર્ચ 2020એ પૂરા થતા આવા દાખલા વધુ એક વર્ષ એટલે કે 31-3-2021 સુધી માન્ય રહેતા મોટી રાહત મળશે. રાજ્યમાં અનૂસુચિત જાતિ-જનજાતિના યુવાઓ-લોકોને જે જાતિ પ્રમાણપત્ર આપવામાં આવે છે તે આજીવન માન્ય રહે છે. આવા SC, ST જાતિ પ્રમાણપત્ર ધારકોએ પણ જે-તે સક્ષમ સત્તાધિકારી પાસેથી મેળવેલા પ્રમાણપત્રો માન્ય રહેશે અને તેની કોઇ સમયમર્યાદા નથી તે બાબત પણ યથાવત રાખવામાં આવી છે.

રાજ્ય

રોપાઓનું વાવેતર (વૃક્ષારોપણ) નુકસાન કરે ?! નવો અભ્યાસ શું કહે છે ?

ખબર ગુજરાત

પ્રકાશિત

on

જામનગર-ગુજરાત સહિત દેશભરમાં વૃક્ષારોપણ અભિયાન હેઠળ ઘણાં લોકો અને પર્યાવરણ અંગે કામ કરતી એન.જી.ઓ. લાખો રોપાઓનું વાવેતર કરતી હોય છે. આપણે સૌ એવું દ્રઢપણે માનીએ છીએ કે, આ રીતે વૃક્ષારોપણ કરવાથી ધરતી લીલીછમ રહે છે, વરસાદને ખેંચી લાવે છે, પૃથ્વીના તાપમાનમાં  સંતુલન જળવાઈ છે અને વધુ વૃક્ષો વાવવાથી આપણું પર્યાવરણ વધુને વધુ શુધ્ધ બને છે. આ પ્રકારની જનસામાન્યની માન્યતાઓથી તદ્ન વિપરીત એવો એક નવો અભ્યાસ વૈજ્ઞાનિકોએ કર્યો છે. આ અભ્યાસમાં તારણો જાણવા જેવા છે.

એક નવો અભ્યાસ એમ કહે છે કે, વૃક્ષારોપણની ખરાબ અને કમજોર નીતિઓને કારણે લોકોના ટેકસના પૈસા બરબાદ થઈ રહ્યા છે. એક સરખા રોપાઓનું વાવેતર કરવાથી વૃક્ષોની ઘણી પ્રજાતિઓ ખતમ થઈ રહી છે અને સાથે સાથે પર્યાવરણમાં વધુ પ્રમાણમાં કાર્બન રિલીઝ થઈ રહ્યો છે.

આ અભ્યાસ સાયન્સ મેગેઝિન નેચર સસ્ટેનેબીલીટીમાં પ્રકાશિત થયો છે. આ અભ્યાસ એમ જણાવે છે કે, કુદરતી જંગલોની સરખામણીમાં વૃક્ષારોપણ અભિયાનમાં લગવવામાં આવેલા રોપાઓને કારણે પર્યાવરણને વધુ નુકસાન પહોંચી રહ્યું છે અને જૈવિક વિવિધતા ખતમ થઈ રહી છે. ઈન્ડિયાસ્પેન્ડ નામના મેગેઝિનમાં છપાયેલા લેખમાં જણાવ્યું છે કે, જંગલો પોતાની મેેળે બને છે ત્યારે  કાર્બનડાયોકસાઈડ જેવા ગ્રીનહાઉસ વાયુઓને ખતમ કરે છે. જે કલાઈમેટ ચેંજને રોકે છે અને તેથી દુનિયામાં કાર્બનનું પ્રમાણ ઓછું થાય છે પરંતુ, વૃક્ષારોપણથી  આ પ્રક્રિયાથી અવળી પ્રક્રિયા થાય છે એમ આ અભ્યાસમાં જણાવવામાં આવ્યું છે.

વર્લ્ડ ઈકોનોમી ફોરમની યોજના એવી છે કે, આખી દુનિયામાં જ્યાં પણ જંગલનો વિસ્તાર ઘટયો હોય ત્યાં ઓછામાં ઓછામાં એક લાખ કરોડ રોપાઓનું વાવેતર કરવામાં આવે. આ સાથે સંયુકત રાષ્ટ્ર સંઘ દ્વારા પણ વૃક્ષારોપણની પ્રવૃત્તિને વેગ આપવામાં આવે છે. આગામી 10 વર્ષ દરમિયાન વિશ્ર્વની 350 મિલીયન હેકટર જમીન પર વૃક્ષારોપણ કરવા માટેનું અભિયાન શરૂ કરવામાં આવ્યું છે.

પૃથ્વી પર અસ્તિત્વ ધરાવતા જંગલોને બચાવવાને બદલે આ પ્રકારના વૃક્ષારોપણ અભિયાનથી વનસ્પતિનું મોનો કલ્ચર વધે છે. મોનો કલ્ચર એટલે એક જ પ્રકારની પ્રજાતિના વૃક્ષોનું વાવેતર. વૃક્ષારોપણની પ્રવૃત્તિને કારણે જંગલ,  ઘાસના મેદાન અને પર્યાવરણિય ઈકો સિસ્ટમ બદલી રહી છે. અભ્યાસમાં એમ પણ જણાવવામાં આવ્યું છે કે, આ પ્રકારના તારણો ભારતમાં હાલ જે સ્થિતિ છે  તેની સાથે બંધ બેસતા છે. વૃક્ષારોપણના આ અભિયાનને કારણે લોકોના ટેકસના પૈસા બરબાદ થઈ રહ્યા છે એમ પણ અભ્યાસમાં જણાવવામાં આવ્યું છે. ભારતમાં  કેટલાંક વર્ષોથી કુદરતી જંગલોની બહાર આ રીતે નવા જંગલો બન્યા છે. ભારતમાં  2022 સુધીમાં દેશની કુલ જમીન પૈકી 33% જમીન પર જંગલો બનાવવા માટેની યોજના છે. હાલમાં દેશની 24% જમીન પર જંગલો છે. ભારતમાં ગુજરાત, તામિલનાડુ અને મહારાષ્ટ્ર જેવા કેટલાંક રાજ્યો એવા છે જે વૃક્ષારોપણ પાછળ કરોડો રૂપિયાનો ખર્ચ કરે છે અને સાથે-સાથે સબસિડી પણ આપે છે. ભારત સરકારની નીતિ પ્રમાણે રાજ્ય સરકારોે ઉદ્યોગો પાસેથી પૈસા લઇને આ પૈસાનો ખર્ચ વૃક્ષારોપણ પાછળ કરે છે એમ પણ અભ્યાસમાં જણાવવામાં આવ્યું છે. આ માટે સીએએમપીએ નામની ફંડ પ્લાનિંગ ઓથોરિટી ભારત સરકારના કેન્દ્રીય પર્યાવરણ મંત્રાલય હસ્તક બનાવવામાં આવી છે.

2020 ના જાન્યુઆરીમાં કોલંબિયા યુનિવર્સિટી તથા અમેરિકાની ધ નેચર ક્ધઝર્વેન્સી એ કર્ણાટકના મૈસુરના નેચર ક્ધઝર્વેશન ફાઉન્ડેશન સાથે મળીને આ અભ્યાસ કર્યો હતો. આ અભ્યાસમાં એમ પણ જણાવવામાં આવ્યું છે કે, અગાઉના વર્ષોમાં 1974 ની સાલથી 2012 ની સાલ સુધી ચીલી નામના દેશમાં સતત 38 વર્ષ સુધી વૃક્ષારોપણનું અભિયાન ચલાવવામાં આવ્યું હતું. આ અભિયાન માટે દેશવાસીઓએ પણ નાણાં આપ્યા હતાં. પરંતુ ચીલીના અભિયાનની વિશેષતા એ હતી કે, ચીલીમાં આ અભિયાન હેઠળ તમામ પ્રકારની પ્રજાતિના વૃક્ષોનું વાવેતર કરવામાં આવ્યું હતું.

વધુ વાંચો

રાજ્ય

ખંભાળિયાના પૂર્વ ધારાસભ્ય મેરામણ ગોરિયા કોરોના પોઝિટિવ

– કાર્યકરોમાં ચિંતાની લાગણી –

ખબર ગુજરાત

પ્રકાશિત

on

ખંભાળિયા તાલુકાના પૂર્વ ધારાસભ્ય અને આ પંથકના આહીર અગ્રણી મેરામણભાઈ ગોરીયાને ગઈકાલે કોરોના હોવાનો પોઝિટિવ રિપોર્ટ સાંપડતા ખંભાળિયા સહિત દેવભૂમિ દ્વારકા જિલ્લામાં ચિંતાની લાગણી પ્રસરી છે.
ખંભાળિયા તાલુકાને કર્મભૂમિ ધરાવતા અને મૂળ કલ્યાણપુર તાલુકાના રણજીતપુર ગામના વતની મેરામણભાઈ મારખીભાઈ ગોરીયા છેલ્લા ઘણા દાયકાઓથી સુરત ખાતે સ્થાયી થયા છે. મુખ્યત્વે અહીંના દેશી ઘી ઉપરાંત બાંધકામ ક્ષેત્રે ઊંચું નામ ધરાવતા અને અગ્રણી વેપારી તથા બિલ્ડર મેરામણભાઈ ગોરીયા ખંભાળિયા- ભાણવડ પંથકના કોંગ્રેસના ધારાસભ્ય તરીકે પણ રહી ચૂક્યા છે.
હાલ સુરત ખાતે સ્થાયી થયેલા મેરામણભાઈ છેલ્લા દિવસોમાં તેમની ઓફિસે કેટલા કોરોના પોઝિટિવ વ્યક્તિઓના સંપર્કમાં આવી ગયા બાદ તેમને કોરોનાના લક્ષણો જણાતા સુરતની ખાનગી હોસ્પિટલ કિરણ હોસ્પિટલ ખાતે ખસેડવામાં આવ્યા હતા. જ્યાં તેમનો કોરોના અંગેનો રિપોર્ટ કરાતા ગઈકાલે તેમને કોરોના હોવાનું જાહેર થયું હતું. આ રિપોર્ટ પછી મેરામણભાઈના ધર્મપત્ની તથા પુત્રો વિગેરેના પણ કોરોના અંગેના સૅમ્પલો લેવામાં આવ્યા હતા. જોકે તમામને પરિસ્થિતિ સંપૂર્ણપણે ભયમુક્ત છે.
ખંભાળિયા પંથકના અગ્રણી અને માજી મંત્રી જેસાભાઈ ગોરીયાના લઘુબંધુ મેરામણભાઈને કોરોના હોવાની વાત વાયુવેગે આ પંથકના પ્રસરી જતા તેમના શુભેચ્છકો- સંબંધીઓને દ્વારા ફોન ઉપર પૃચ્છા કરી, તેઓ ઝડપથી સાજા થઈ જાય તે માટેની શુભકામના પાઠવવામાં આવી હતી.

વધુ વાંચો

રાજ્ય

પિરોટન નાં વિકાસ માટે વિશ્વના શ્રેષ્ઠ તજજ્ઞો ની સેવા લેવાશે

બેટ દ્વારકાના વિકાસ માટે બેટ દ્વારકા આયલેન્ડ ડેવલપમેન્ટ ઓથોરિટીની રચના કરાશે

ખબર ગુજરાત

પ્રકાશિત

on

મુખ્યમંત્રી વિજયભાઇ રૂપાણીની અધ્યક્ષતામાં ગાંધીનગરમાં મળેલી આયલેન્ડ ડેવલપમેન્ટ ઓથોરિટીની ત્રીજી બેઠકમાં પિરોટન ટાપૂને નેચર રિલેટેડ એકટીવીટીઝ માટેનું પ્રવાસન આકર્ષણ કેન્દ્ર બનાવવા માટે તેનો વિકાસ પર્યાવરણ જાળવણી સાથે કરવામાં આવે તેવો નિર્ધાર વ્યકત કરવામાં આવ્યો હતો.
આ બેઠકમાં એવો મહત્વપૂર્ણ નિર્ણય લેવામાં આવ્યો કે પૂરાતન સાંસ્કૃતિક વિરાસત ધરાવતી બેટ દ્વારિકાના સર્વગ્રાહી પ્રવાસન વૈવિધ્યસભર વિકાસ માટે બેટ દ્વારકા આયલેન્ડ ડેવલપમેન્ટ ઓથોરિટીની રચના રાજ્ય સરકાર કરશે.
રાજ્યના પિરોટન, શિયાળ બેટ અને બેટ દ્વારકા ટાપૂઓના પ્રવાસન વિકાસની વ્યાપક સંભાવનાઓને પ્રાથમિક તબક્કે રૂ. ૧૦૮ કરોડના ખર્ચે વિકાસ કરવા અંગે ગહન ચર્ચા-વિચારણા આ બેઠકમાં હાથ ધરવામાં આવી હતી.

ગુજરાત ૧૬૦૦ કિ.મી. લાંબો સમુદ્રકિનારો અને ૧૪૪ થી વધુ આયલેન્ડ સ-બેટ ધરાવતું દેશનું વિકાસશીલ રાજ્ય છે તે સંદર્ભમાં ભારત સરકારની આયલેન્ડ ડેવલપમેન્ટ પોલિસીને સુસંગત રાજ્યના આયલેન્ડ ટાપૂઓના વિકાસ માટે ગુજરાત સરકારે ગત ઓગસ્ટ માસમાં આયલેન્ડ ડેવલપમેન્ટ ઓથોરિટીની રચના કરેલી છે.
આ ઓથોરિટીનો હેતુ રાષ્ટ્રીય સુરક્ષાની જાળવણી સાથે આ ટાપૂઓ પર આર્થિક ગતિવિધિ અને પ્રવાસનને પ્રોત્સાહન આપવાનો છે.
મુખ્યમંત્રીની અધ્યક્ષતામાં મળેલી આ ઓથોરિટીની ત્રીજી બેઠકમાં નાયબ મુખ્યમંત્રી નીતિનભાઇ પટેલ, મહેસૂલ મંત્રી કૌશિકભાઇ પટેલ, પ્રવાસન મંત્રી જવાહરભાઇ ચાવડા, પાણી પૂરવઠા મંત્રી કુંવરજીભાઇ બાવળીયા તેમજ ગૃહ રાજ્ય મંત્રી પ્રદિપસિંહ જાડેજા પણ સહભાગી થયા હતા.
પિરોટન ટાપૂ પર જવા-આવવા માટે દરિયાઇ ભરતી વેળાની સ્થિતી વિષયક બાબતો અંગે બેઠકમાં વિસ્તૃત પ્રેઝન્ટેશન કરવામાં આવ્યું હતું.
મુખ્યમંત્રીએ આયલેન્ડ ડેવલપમેન્ટ ઓથોરિટીને એવું પ્રેરક સૂચન કર્યુ હતું કે પિરોટન, શિયાળ બેટ અને બેટ દ્વારકા આયલેન્ડ ના પ્રવાસન આકર્ષણ કેન્દ્ર રૂપ વિકાસ માટે ડિટેઇલ્ડ પ્લાનીંગ કરીને વિશ્વના આ ક્ષેત્રના શ્રેષ્ઠ તજ્જ્ઞોની સેવાઓ પણ તેમાં જોડવામાં આવે.
તેમણે પિરોટન ટાપૂની વિશેષતા એવા કોરલ સહિત બર્ડવોચિંગ, લાઇટ હાઉસ વગેરેને પણ પ્રવાસન હેતુસર વિકસીત કરવા જણાવ્યું હતું.
મુખ્યમંત્રીએ આ ટાપૂઓ પરની પ્રવાસન સહિતની વિવિધ ગતિવિધિઓમાં સ્થાનિક યુવાઓને રોજગારી મળે તે માટે આઇ.ટી.આઇ દ્વારકાને મરિન સ્કીલ ટ્રેનિંગ સેન્ટર તરીકે કાર્યરત કરવા સંબંધિત વિભાગોને સંકલન માટેની તાકિદ કરી હતી.
મુખ્ય સચિવ અનિલ મૂકીમ, મુખ્યમંત્રીના મુખ્ય અગ્ર સચિવ કે. કૈલાઇનાથન, ગૃહ, મહેસૂલ અને શહેરી વિકાસ વિભાગના અધિક મુખ્ય સચિવો, મુખ્યમંત્રીશ્રીના અગ્ર સચિવ એમ. કે. દાસ તેમજ સચિવ અશ્વિનીકુમાર, વન-પર્યાવરણ, પ્રવાસન વિભાગના વરિષ્ઠ સચિવો આ બેઠકમાં જોડાયા હતા.

વધુ વાંચો
Advertisement

ટ્રેન્ડીંગ